HARI SATU, 20 MARCH 2023
MIRI: Pengawa ngemeran servis digital ba industri dagang temuai tau bendar mai industri nya mansang ngagai tikas ke tinggi agi.
Sapit Menteri Dagang Temuai, Industri Kreatif enggau Seni Pemerindang, Datuk Sebastian Ting Chiew Yew madah, chara digital dipeda ulih napi penanggul suntuk pengereja pengawa ba tuju mulaika pemanah tikas sektor nya.
Nya alai ku iya, beberapa bengkah pengawa ke digaga opis menteri iya benung dipenyadika diatu ba tuju nyungkung industri nya.
“Chara digital dipeda nyadi chara ke pemadu engkeman dikena ngelakuka dagang temuai menua.
“Taja kitai agi bisi penanggul suntuk pengereja pengawa tang industri dagang temuai agi ulih disungkakka kitai manah agi taja nyangka bisi lubah,” ku iya madah ngagai memdia.
Iya bejaku munyi nya udah program randau bekaul enggau ‘What if Labour Shortage Is a Long-term Threat to a Sustainable Recovery for Tourism’ ditu, empai lama tu tadi.
Maya nya mega, Datuk Sebastian madah, dagang temuai nyadi siti ari batang penatai ekonomi ba Pelin Pemansang Udah COVID-19 (PCDS) 2030 ti ngemeratka pengawa meransang ekonomi ke lebih agi puh sereta tan.
Bekaul enggau penanggul suntuk orang gawa ba dagang temuai, iya madah, sida ke udah pinchin tang agi regas tau bendar ngulu latih ba pekara dagang temuai ngambika sida bisi kereja baru.
Program randau sehari nya diatur Prof Andreas H. Zins ti bela digulu Menteri Pengangkut Sarawak Dato Sri Lee Kim Shin.
Program nya sebagi ari Gempuru Besai Tuju Pemansang Borneo (BSDG) ke diatur dua hari berunggu berengkah 18 ngagai 19 March 2023.-EDISI UKAS