HARI SATU, 18 SEPTEMBER 2023

SEBUYAU: Penemuai gawa Sapit Menteri Besai, Datuk Patinggi Dr. Ahmad Zahid Hamidi ngelai sukung Perintah Besai ngagai pemansang enggau pengelantang rayat menua nya.

Menteri Utiliti enggau Telekomunikesyen Sarawak, Datuk Julaihi Narawi madah, iya ukai semina ngena awak nya betemu enggau rayat dia tang mega mai berita manah bekaul enggau pengawa meri beberapa iti geran.

Iya madah munyi nya maya ngenataika jaku pengelalu maya Program Rayat begulai enggau Sapit Menteri Besai Malaysia ke pelilih Sebuyau ba Sekula Primeri (SK) Haji Bujang Sebangan ditu, Hari Minggu tu tadi.

Iya mega madah, Menteri Pemansang Genturung Pendiau enggau Kandang Menua nya datai nyauka Geran Perlengkapan Kampung Ameniti Sosial ke beungkus RM1,580,000 ari Opis Ngempung enggau Ngatur Tanah (FELCRA) Berhad nyengkaum Geran Perlengkapan Kampung Premis Perniagaan (RM120,000) enggau Geran Program Pembangunan Kelestarian dan Kemampanan Infrastruktur Pelancongan Desa (RM180,000).

“Bela bisi diberi iya nya bantu sekula Yayasan Pelajaran MARA (YPM) ari Majlis Amanah Rakyat (MARA) Negeri Sarawak sepenyampau RM10,000 ke diberi enggau mata duit RM100 nengah chara ‘one-off’ ngagai 100 iku nembiak SK Haji Bujang Sebangan ke datai ari ruang bilik B40.

“Kelimpah ari nya, MARA Nengeri Sarawak mega bisi meri bantu bayar dagang RM458,000, Bantu Program Rumah Seranta (PPRT) enggau Bakul Pemakai (RM255,000) sereta ‘mock cheque’ ngagai dua penerima Skim Mudah Jaya (SPiM) enggau Skim Pembiayaan Kontrak Ekspres (SPiKE) enggau Surat Tawaran Pembiayaan Perniagaan MARA ngagai siku penerima Skim SPiKE (RM458,000).

“Geran RM10,000 ari Opis Pemansang Mensia Mayuh (KEMAS) Nengeri Sarawak mega bsi disuaka ngagai 10 penyereta Kus Pengelandik Kits Quick Win,” ku iya nerang.

Maya nya mega, Datuk Patinggi Dr Ahmad Zahid bisi ngemendarka agih belanja RM10 juta dikena ngaga Giat Mara di Sebuyau ke meseti digaga taun tu.

Kelimpah ari nya, FELCRA Berhad nyaup meri injin padi dikena peranak menua nya alai Agensi Pemansang Bersepadu Wilayah Samarahan (IRSDA) bela nyaup.

Bela datai maya program nya Sapit Menteri Pemansang Genturung Pendiau enggau Kandang Menua ke mega Kaban Parlimen Kota Samarahan Datuk Rubiah Wang, Sapit Menteri Kuasa enggau Pemeruan Rampa Menua Sarawak Dr Hazland Abang Hipni, Kaban Parlimen Batang Lupar Mohamad Shafizan Kepli, Tuai Sekretari Opis Menteri Pemansang enggau Kandang Menua Dato’ Sri Ramlan Dato’ Harun enggau Residen Sitak Samarahan Mohamad Irwan Bahari Bujang. -Edisi UKAS

add comment