KUCHING: Komiti Besai Sekuriti Malaysia (SC) berati ke pengulih besai Sarawak ngerembai kaul ba makit puku menua, nyengkaum kompeni diempu Perintah Sarawak masuk ba rintai saham dudi hari.
Chairman SC, Dato Mohammad Faiz Azmi madah, raban sida udah berandau enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg senentang pekara nya nyengkaum ripot media empai lama pasal engka Sarawak Energy dipasuk ba rintai saham kandang dua taun deka datai.
“Nya alai kami datai ngambi nukuka pekara tu nyadi sebagi ari perambu lalu sekali ke bisi aset bukai di Sarawak ti bisi pengulih dipasuk ba rintai saham.
“Kami mega berandau pasal perambu iya enggau anak kompeni perintah engka deka dipasuk ba rintai saham,” ku iya.
Iya nyebut pekara nya ba aum media pengudah ngatur penemuai basa ngagai Datuk Patinggi Abang Zohari di Kompleks Satria Pertiwi, ditu, Hari Lima.
Berebak enggau nya, iya nerangka randau mega bisi ngenang pasal melanja projek infrastruktur di Sarawak ti setengah ari nya udah ngena manah makit puku.
“Naka diatu, penyampau semua makit puku Malaysia urung RM4.1 trilion lalu kami diatu ngelawa nengeri ngambi sama berati sekali ke sida bisi ati ngena manah makit tu, sekali ke nengah saham tauka bon,” terang iya.
Kelimpah ari nya, Dato Mohammad Faiz madah ke randau nya bisi ngenang pejalai levi karbon di Sarawak enggau polisi perintah besai sereta pangku pengawa operator baka SC.
“Ba sukut kuasa bukai, kredit karbon dikategori nyadi sekuriti enggau diatur gempung baka kami. Nya alai kami mega berandau pasal chara Sarawak ngatur pekara tu,” ku iya.
Ngenang silik agi, iya madah ke diri chukup temegah meda visyen pemansang Sarawak ti nyengala ke alai ku iya chukup konsisten enggau bepuguka pelin timpuh panjai ti tegap.
Sama datai, Direktor Eksekutif Komunikasyen Strategik SC Datuk Seri Abdul Jalil Hamid, Tuai Pegawai Pemeruan Neetasha Rauf enggau Direktor SC Shahrul Amry Abd Malek. -EDISI UKAS
