KUCHING: Pengawa ngabang Aidilfitri Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar, enggau bini, Toh Puan Datuk Patinggi Fauziah Mohd Sanusi ditampung ngagai rumah Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah ditu, Hari Dua tu tadi.
Pengawa nya mandangka pemanah kaul institusyen nengeri enggau raban Kabinet Sarawak, nyerumba penegap penyerakup ke nyadi pugu pengelantang rayat pupu bansa nengeri tu.
Bela nyempulang ngabang maya nya, anak Tun Pehin Sri, Sharifah Fariah enggau Sharifah Nong-Jasima sereta Sapit Menteri ba Opis Premier Sarawak (Pengatur Projek Agensi Pemansang Wilayah Sarawak, Dewan Bandaraya Kuching Utara enggau Pekara Islam Sarawak), Datuk Dr Abdul Rahman Junaidi.
Tun Pehin Sri enggau Toh Puan beterima kasih ngagai Dato Sri Abdul Karim ke udah ngelalu penatai seduai ngabang maya nya.
Iya mega madah, pengerami Aidilfitri nyadi pelasar ke engkeman dikena ngenegapka agi kaul bala pemesai enggau rayat mayuh. -EDISI UKAS
