KUCHING: Sarawak nempa pemutus pemadu manah ba peresa Sijil Pelajaran Malaysia (SPM) 2025 ti ngerikod Gred Purata Negeri (GPN) 4.79, nambah 0.05 dibanding 4.84 taun sebedau nya.
Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madah, chalun ari mengeri ngerikod skor 4.44 dibanding 4.46 ba SPM 2024.
Ku iya, chalun ari menua pesisir bela ngerikod pemujur enggau pemutus nambah 0.08, ari 5.11 maya SPM 2024 ngagai 5.03 ba SPM 2025.
"Tu mandangka pengeransing kitai ngerapitka seraka pelajar mengeri enggau menua pesisir diatu mulaika asil," ku iya ba aum media mantai pemutus SPM 2025 ditu, Hari Dua.
Iya mega madah, bisi 27 buah sekula pas 100 peratus lalu ari penyampau nya 19 buah sekula menua pesisir.
Dato Sri Roland madah, bisi 853 nembiak ari semua 34,166 iku chalun bulih semua A ba peresa nya.
Ku iya, penyampau chalun ke ulih nerima setipikit SPM bisi 31,506 iku tauka 93.99 peratus, kurang 0.12 peratus enti dibanding enggau SPM 2024.
"Taja peratus nya kurang, penyampau nembiak ke bulih setipikit SPM kebendar iya mayuh, nambah 1,165 iku.
"Tu pemutus ti ngemegahka Sarawak," ku iya madah baru.
Kelimpah ari nya, iya mega madah, subjek Matematik, Jaku Inggeris enggau Sains bisi nambah skor antara 0.01 ngagai 0.25.
Ba subjek elektif STEM tulen, iya nya Kimia, Biologi enggau Matematik Tambahan bela bisi nambah.
Dato Sri Roland maya nya mega madahka diri berasai temegah ati alai chalun pelajar khas bela nempa peratus mayuh agi bulih setipikit SPM iya nya 72.73 peratus.
Kelimpah ari nya, iya madah, empat iku chalun khas bulih semua A.
Bela datai maya nya Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis enggau Direktor Opis Pelajar Nengeri Sarawak Omar Mahli. -EDISI UKAS
Pemberita: Ahmad Daniel Faiz
Gambar: Muhd Hisyam Arif
