Orang Gawa Perintah Meseti Nyeliah Ulah ‘Little Napoleon’
KUCHING: Orang gawa perintah ditangkan nyeliah ulah ngira diri empu sereta salah guna kuasa ti ulih ngeruga integriti servis perintah.
Sapit Menteri ba Opis Premier Sarawak (Integriti enggau Ombudsman), Datuk Dr Juanda Jaya madah, taja tikas makai suap di Sarawak ulih dijaga lalu enda ngirauka ati, tang budaya integriti patut terus ditegap dikena nentuka administrasyen nengeri terus beresi, lurus enggau bisi auntabiliti.
“Kala bisi sekeda raban ti dikumbai aku ‘little Napoleon’ tauka ‘little Rasputin’, sida tu ngasuh tauka ngaga pemutus nadai pematut tauka penuduk, beambi ulih ari pengiruh bala tuai kanan. Ulah baka tu meseti diketu,” ku iya nyemetak.
Datuk Dr Juanda mantangka jaku nya ba mua mayuh ba pengerami Hari Benchi Makai Suap Antarabansa (HARA) ti ngempuru 501 kaban nyengkaum pegawai enggau staf agensi penerit adat di Sarawak di Palan Konvensyen Borneo Kuching (BCCK) kena Hari Lima.
Iya nyemetak madah pengawa ngintu HARA ukai semina pengerami ninting taun aja, tang mandang pengeransing global enggau nasional munas penyalah makai suap.
Iya ngena peluang nya meri terima kasih ngagai Komiti Besai Nagang Penyalah Makai Suap Malaysia (SPRM) Sarawak ti seruran ransing munas penyalah makai suap, kelimpah meri pengaga ati ke penau nyadi tuai enggau ngembing agensi nya semampai nemban.
Datuk Dr Juanda mega madah ke Perintah Sarawak deka terus negap administrasyen ti beresi nengah polisi, negap sistem matau enggau pelajar integriti ba orang gawa perintah.
“Mekuh budaya integriti bepun ari kitai empu. Kitai ti ngesan tanggungpengawa nampung pemujur nengeri tu beresi agi ungkup rebak dudi,” tandu iya.
Sama datai, Sapit Kepala (Operasyen) SPRM Dato’ Sri Ahmad Khusairi Yahaya, Direktor Unit Integriti enggau Ombudsman Sarawak (UNIONS), Wan Mohamad Wan Drahman, Direktor SPRM Sarawak, Hasbilah Mohd Salleh, bala tuai opis enggau temuai dipebasa bukai.-EDISI UKAS
Pemberita: Maryam Zanariah Ibrahim
Gambar: Maryam Zanariah Ibrahim
