BETONG: Sekretari Perintah Sarawak Datuk Amar Mohamad Abu Bakar Marzuki udah ngatur penemuai gawa ke Sitak Betong enggau Sri Aman ngabas gaya perengka guna Opis Pelilih, Opis Pelilih Mit sereta taba baru kuarters enggau opis pelilih ti udah dikemendar Perintah Sarawak.

Penemuai gawa nya nyengkaum ngelawa Opis Pelilih Mit Debak, Opis Pelilih Mit Nanga Budu, Opis Pelilih Pusa enggau Opis Pelilih Mit Maludam.

Batang pejalai gawa nya berati gaya begunan ke bisi, opis sereta peneras arus internet enggau Wi-Fi di sitak nya.

Kelimpah ari nya, Datuk Amar Mohamad Abu Bakar mega bisi limpang berandau enggau bala staf opis perintah ti dilawa dikena ngulihka timbal pasal pemar pengawa besehari-sehari nyengkaum pematut nyeruri, ngemanah infrastruktur sereta isu bukai ti patut diperati jampat.

Iya madah, gaya kereja ti kondusif, rentayan internet ti entap sereta perambu projek ti berurun pugu besai nentuka servis perintah mujur dikenatai lebih agi ba menua pesisir.

Bela nyempulang iya ba pejalai gawa nya Sapit Sekretari Perintah Sarawak (Administrasyen) Datu Buckland Bangik, Direktor Unit Digitalisasyen Servis Perintah Grace Huong Siew Hung, Direktor Unit Administrasyen Rusmaliza Mat Darus, Direktor Unit Pengelilun enggau Penerit Adat Sarawak Abdul Wahab Rahim sereta raban pegawai kanan ari Opis Premier Sarawak. -EDISI UKAS