Anugerah Pemadu Tinggi Jepun Kelai Dunya Ngaku Penyulut Sarawak, Basa Ngagai Semua Rayat
TOKYO: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah ke anugerah The Order of the Rising Sun, Gold and Silver Star ari Maharaja Naruhito siti basa besai ukai semina ngagai iya aja tang mega ngagai semua rayat Sarawak.
Nitih ku iya, basa besai ari Perintah Jepun nya mandangka pengandal sereta basa dunya ngagai pengeransing tegut Sarawak negap kerejasama ekonomi sereta ngemudi bidang kuasa ulih dikena baru enggau teknologi dudi hari.
"Aku meri terima kasih ke anugerah tu. Aku sempat betemu sereta berandau enggau Maharaja Jepun lalu baginda madahka diri temegah ati meda kaul manah entara Malaysia enggau Jepun.
"Aku bela madahka Sarawak ngagai baginda ke udah nemu pengawa pemansang ekonomi baru ke dipejalai di nengeri kitai,” ku iya maya dirandau Unit Komunikasi Awam Sarawak (UKAS) enggau TVS sepengudah nerima Anugerah The Order of the Rising Sun, Gold and Silver Star ari Maharaja Naruhito, Hari Dua.
Nambah ke jaku iya, Premier Sarawak madah, basa ari antarabansa nya ngayanka dunya ngaku penyulut polisi pemansang nengeri, lebih agi ba nyerungkai bidang baru ti berati pemeruan rampa menua sereta pengelantang rayat.
"Pemadu beguna, sida ngaku Sarawak benung mansang nuju eknomi baru ba jeman baru tu.
"Kitai sama begulai enggau menua ke nyerungkai polisi ti meri pengelebih ngagai pemeruan rampa menua sereta nambah penatai pemisi rayat,” ku iya.
Berebak enggau nya, Datuk Patinggi ngarap pengawa meri anugerah besai tu nyadi peransang nembiak Sarawak majak ransing nempa penyulut ba renggat global.
"Aku beterima kasih laban aku siku aja ari Pulau Borneo nerima anugerah tu lalu enda mayuh orang bulih anugerah tu. Tu reti iya enti nembiak Sarawak beratika bidang baru enggau nempa penyulut, dunya deka ngaku kitai,” ku iya nerang.
Iya mega madah, Sarawak diatu nyerungkai peluang kerejasama enggau Jepun ba bidang kuasa fusiun, nangkan pemujur Jepun bejalaika peresa kuasa baru nya kenyau Julai tu tadi.
"Kemari aku udah berandau enggau Presiden Japan Malaysia Association lalu iya deka mai pekara tu ngagai Menteri Besai Jepun.
"Lalu aku deka berandau enggau Menteri Besai Malaysia bekaul pengulih kerejasama ba kuasa fusiun. Kitai deka nyerungkai pemansut kuasa baru tu begulai enggau Jepun nyadi sebagi ari agenda ekonomi gadung nengeri,” ku ya nerang baru.
Iya madah, inisiatif nya setipak enggau juluk Sarawak ke deka ngemansangka ekonomi baru bepuguka inovasyen, teknologi enggau pemeruan penatai kuasa.-EDISI UKAS
