SEOUL: Perintah Sarawak mantu nembiak Islam ari Pulau Pasifik belajar sereta nampung pelajar ba sekula Islam antarabansa ba nengeri tu.

Premier Sarawak ke mega Presiden Regional Islamic Da'wah Council of Southeast Asia and The Pacific (RISEAP), Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif nya sebagi ari pengeransing Sarawak ke deka mantu raban menua bukai ba negap rayat Islam di rantau sida empu.

“Aku udah meri jaku timbal ngagai RISEAP Executive Committee bekaul kitai di Sarawak udah numbuh sekula antarabansa Islam.

“Lalu kitai deka meri peluang ngagai nembiak Islam ba pulau Pasifik ke suntuk pelajar ba kandang menua nya ngambi belajar ba Sarawak, ba sekula kitai.

“Pekara nya deka ngerapitka agi kaul rayat ba kandang menua RISEAP enggau menua nya,” ku iya maya dirandau Unit Komunikasi Awam Sarawak (UKAS) enggau TVS pengudah ngetuaika Aum Komiti Eksekutif RISEAP Ke-36 ditu, Hari Tiga.

Nambah ke jaku iya, Premier madah, inisitiaf sebaka kala digaga Malaysia ba mantu rayat Islam di Bosnia.

Ku iya nerang, chara dipejalai RISEAP tu mega seriris enggau konsep dakwah ‘Bil Hal’ ti ransing negapka raban Islam.

“Ngenang gaya sosioekonomi sida ti agi kurang, nya alai siti pekara ti manah alai kitai meri awak ngagai siku, dua tauka 10 iku nembiak belajar ba sekula Islam antarabansa, nyadi ‘residential scholar’, nyentuk renggat tinggi.

“Pengujung iya sida deka mulai baru ke menua asal sida,” ku Premier baru.
Ba aum, iya madah, RISEAP udah nerima sekeda ripot bekaul pengawa ti dipejalaika raban menua iya.

Sama datai, Sapit Menteri di Opis Premier Sarawak (Pengatur Projek Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Sapit Menteri Ekonomi Dato Hanifah Hajar Taib, Sekretari Kehormat RISEAP Dato' Mohamad Marzuki Mohamad Omar, Yang Dipertua Kaunsil Islam Sarawak Datuk Misnu Taha, Mufti Sarawak Datuk Kipli Yasin sereta Exco RISEAP ke bukai. - EDISI UKAS