SEOUL: Regional Islamic Da'wah Council of Southeast Asia and The Pacific (RISEAP) besai tanggungpengawa nyadi pelasar bekunsi penemu entara Muslim enggau ukai Muslim ungkup pengelantang semua, ukai semina ungkup pengarap Islam aja.
Premier Sarawak ti mega Presiden RISEAP, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, chara nya ungkup mayuh jalai pengarap sama negap pemansang modal mensia.
“RISEAP ukai semina ngaul pengarap Islam, tang iya bekunsi penemu entara Muslim enggau ukai Muslim ungkup pemaik mensia. Nya chara kitai lalu iya meri pemaik ngagai semua,” ku iya.
Iya madah munyi nya maya dirandau Unit Komunikasi Awam Sarawak (UKAS) enggau TVS sepengudah ngetuaika Aum Komiti Eksekutif RISEAP Ke-36 ditu, Hari Tiga.
Sama datai, Sapit Menteri ba Opis Premier Sarawak (Pengatur Projek Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Sapit Menteri Ekonomi Dato Hanifah Hajar Taib, Sekretari Kehormat RISEAP Dato' Mohamad Marzuki Mohamad Omar, Yang Dipertua Kaunsil Islam Sarawak Datuk Misnu Taha, Mufti Sarawak Datuk Kipli Yasin sereta Exco RISEAP ke bukai.
Ku iya, pengawa bekunsi tu merati ke pekara ti bekaul enggau bidang teknologi sereta budaya enggau menua bukai ti ngembuan pengelandik.
Ngambi New Zealand, Korea Selatan sereta bakih strategik bukai nyadika chunto, ti ngembuan pengelebih sereta pengelandik ba teknologi enggau inovasyen ti ulih bela sama ngena.
“Ba pengawa betanam betupi, New Zealand ulih mantu kitai ngenang Malaysia deka ngemansangka sektor betanam betupi iya nengah pengawa bekenaka Artificial Intelligence (AI) enggau teknologi baru.
“Kelimpah ari nya, Korea ngembuan pengelandik ba bidang injiniring, lalu kitai ulih bekerejasama enggau sida nengah nganjung nembiak kitai belajarka teknologi sida,” ku iya.
Ba konteks tu, Premier madah perintah nengeri mega benung bekerejasama enggau Samsung ba bidang kuasa gadung.
Ku iya, utai ke dipejalaika nya setipak enggau chara ti dikena tukuh Islam tebilang, Ibnu Khaldun ti ukai semina ngembuan tuju ngenegap raban Islam tang ungkup pemaik semua.
Kelimpah ari nya, Premier Sarawak meri bantu belanja sepenyampau USD25,000 ungkup pemansang raban Islam di Seoul.
Iya madah, pemeri nya maya ngatur penemuai gawa ngagai Opis Halal Korean Muslim Federal (KMF) sepengudah bejadika organisasyen nya.
Ari penyampau nya, USD15,000 diberi ngagai KMF dikena nyendia perengka guna opis baru kaunsil nya.
Seraya USD10,000 da diberi ngagai Taska Prince Sultan bin Abdul Aziz ke dulu ari nya dipenyadika Premier Sarawak.
Premier Sarawak mega dibasa bejadika pengawa nyeleti Seoul Central Mosque, masjid pemadu tuai ba menua nya. - EDISI UKAS
