KUCHING: Isu suntuk staf perubat ba Sarawak ulih diputar nengah pengawa bekenaka teknologi Artificial Intelligence (AI) ba sektor pengerai, ti deka lalu nambah pemanah servis hospital enggau klinik nengeri tu.
Sapit Premier Sarawak, Datuk Amar Profesor Dr. Sim Kui Hian madah, AI bisi pengulih besai nyaup kereja perubat, lebih agi ba diagnosis, emijensi enggau matau pengerai orang sakit, kelimpah ngelimat ungkus operasyen ba timpuh panjai.
“Di Sarawak, kitai suntuk lebih 1,000 lutur di hospital perintah. Taja pen Opis Menteri Pengerai nganjung 650 lutor ari Kuala Lumpur kenyau Oktober, semina 66 peratus datai ngeripot diri ke Sarawak. Nyadi, AI ulih mantu ngurangka tating tu nengah ngerumban proses diagnosis enggau berubat,” ku iya nerang.
Iya madah munyi nya ngagai media pengudah ngulu program SwinTalk: AI Driven Futures di Swinburne University of Technology Sarawak ditu, Hari Tiga.
Nitih ku Datuk Amar Prof Dr. Sim, AI ulih nambah produktiviti enggau nambah manah pemujur pengawa staf pengerai, ambi ke chunto, tiga staf ti gawa ulih disilih siti sistem AI nengah chara automatik, lalu pengereja pengawa ulih dikena strategik agi.
Iya mega bekunsi bekaul projek pemekuh bekenaka lutur AI ti deka dipejalai di Miri bulan baru nengah kerejasama enggau Fudan Institute of Integrative Medicine, ke ngena teknologi ari China.
“Tu keterubah teknologi lutur AI baka tu dikena ba luar China, lalu kami beterima kasih laban udah bekunsi penemu nya. Aku empu deka ngemata baka ni sistem tu bejalai laban bisi maya AI mega patut ditisih ari sukut pengelikun enggau betul ke enda,” ku iya.
Berebak enggau nya, Datuk Amar Prof Dr. Sim bela ngemerat pemesai guna nampung polisi pengerai Perintah Sarawak enggau Opis Menteri Pengerai Malaysia (KKM) ba baruh konsep Autonomi Pengerai Sarawak, ngambi atur hospital, klinik enggau pengereja pengawa ulih dipejalai enggau chara ti berurun lalu nadai teruga ketegal ubah administrasyen ba renggat perintah besai.
“Tiap kali Tuai Direktor tauka Tuai Sekretari berubah, mayuh pekara belabuh baru. Kitai ngarap polisi tu ulih dientap ngambi Sarawak ulih ngatur sistem pengerai kediri empu enggau efektif agi,” ku iya.
Iya mega ngaku suntuk staf pengerai ngasuh lutur enggau indu misi di Sarawak napi pemar gawa, tang iya andal integrasyen teknologi AI deka nyadi sebagi ari chara mutar timpuh panjai dikena nentuka akses pengerai ti bekualiti ungkup semua rayat Sarawak.-EDISI UKAS
Pemberita : Maryam Zanariah Ibrahim
Gambar : Hazrin
