SEOUL: Sapit Presiden Regional Islamic Da'wah Council of Southeast Asia and The Pacific (RISEAP) ti baru, Datuk Dr Abdul Rahman Junaidi besedia bejalaika pengawa ke diberi ngagai iya enggau manah.

Iya ke mega Sapit Menteri ba Opis Premier Sarawak (Pengatur Projek Agensi Pemansang Kandang Menua, DBKU enggau Pekara Islam) sedia nyaup Premier Sarawak ke mega Presiden RISEAP Datuk Patinggi Tan Sri (Dr) Abang Abdul Rahman Zohari Tun Datuk Abang Openg sereta Exco kaunsil nya ngenegap pemansang raban Islam serantau.

“Aku deka meri terima kasih ngagai YAB Premier ti andal ke aku nyadi Sapit Presiden RISEAP ba Aum Exco Ke-36 ke udah diatur ba Mengeri Seoul, Korea Selatan.

“Aku deka bejalaika pengawa enggau pemanah lalu aku deka nyaup YAB Premier ke mega Presiden RISEAP begulai enggau raban Mandal Presiden sereta Kaban Exco RISEAP ke diatu,” ku iya.

Iya madah munyi nya maya dirandau Unit Komunikasi Awam Sarawak (UKAS) enggau TVS sepengudah ngulu Aum Komiti Eksekutif RISEAP Ke-36 ditu, Hari Tiga.

Ku iya, RISEAP ke bisi raban ari 24 menua megai tanggungpengawa besai nyaup raban Islam.

Nitih ku iya, Sarawak ke nyadi siti raban kaunsil nya bela nyaup mantu raban menua bukai nengah numbuh Tabung Baitulmal di New Zealand enggau Hong Kong.

Pengawa nyiri Datuk Dr Abdul Rahman sepengudah ex Sapit Presiden RISEAP, Ridzuan Wu ari Singapura ngemadu kediri ketegal enda entu pengerai.

Iya deka mangku pengawa nya nyentuk Aum Besai RISEAP ke dipelaba diatur tengan taun 2026. - EDISI UKAS