KUCHING: ASEAN UniFest Competition 2025 ti diatur serimbai ASEAN International Film Festival & Awards (AIFFA) sekali agi nyadi pelasar mandangka penau nembiak universiti selampur ASEAN lalu negap penuduk Sarawak ba industri dagang temuai kreatif enggau filem betikas renggat antarabansa.

Sapit Menteri Dagang Temuai, Industri Kreatif & Seni Pemerindang Sarawak Datuk Snowdan Lawan madah, industri kreatif, nyengkaum filem, nyungkak pemansang ekonomi nengeri, ngerandang peluang pengawa puang baru sereta negap dagang temuai kreatif.

“Di Sarawak, opis menteri kami nyendiaka bantu belanja ngagai sida ke bisi ati belajar ngaga filem.

“Belanja tu ulih dikena sida ke belajar program sarjana tauka woksyop lalu ngadaka pengajar filem ti bepengelandik," ku iya maya bejaku ba program ASEAN UniFest 2025 di The Spring Mall, Hari Tiga.

Kelimpah ari nya, iya mega madah, Performing Arts Centre beungkus RM300 juta ke deka nyadi siti ari palan seni pemerindang moden di Asia Tenggara ulih alai ngatur macham program antarabansa nyengkaum orkestra, opera enggau teater.

“Projek tu beungkus urung RM300 juta. Palan seni tu sebaka enggau Istana Budaya lalu keterubah di Asia Tenggara.

“Palan tu ulih ngatur macham program antarabansa ari orkestra, opera nyentuk ngagai teater," ku iya.

Datuk Snowdan Lawan bela meri terima kasih ngagai pengatur AIFFA enggau ASEAN PR Network laban udah meri awak ngagai nembiak mandangka penemu bekaul SDG nengah pelasar filem.

Program bela digulu Direktor Festival AIFFA 2025, Livan Tajang, Direktor Eksekutif AIFFA 2025, Jaffri Amin enggau Shah Sidek, Chairman ASEAN UniFest, Andrew Trigg, Sapit Direktor Atur Program Akreditasi enggau Setipikit ASEAN Public Relations Network, Dr Alexander Mamby Aruan sereta raban temuai dipebasa bukai ari industri filem, media, penyereta ASEAN UniFest enggau nembiak universiti.-EDISI UKAS

Pemberita: Betrice Britney Dee
Gambar: Shahril Haqim