SEMATAN: Pengeransing Perintah Sarawak negap perengka guna menua pesisir majak ditegap nengah pengawa ngaga tiga projek pemansang di pelilih Lundu.

Projek tu iya nya ngaga jematan baru enggau nyeleti sistem paip graviti ba tiga genturung pendiau.

Kaban Kunsil Nengeri (ADUN) Opar Billy Sujang madah, projek nya sebagi ari pengeransing perintah nengeri nentuka rayat menua pesisir ngasai perengka guna ti manah agi, likun sereta bisi kualiti.

Nitih ku iya, pengawa ngaga jematan konkrit baru ba Kampung Sebako 2 beungkus RM7 juta udah berengkah kena 7 November tu tadi lalu disadang tembu 6 November 2026.

“Jematan tu deka meri pemaik ngagai peranak menua laban iya deka ngemuntangka pengawa sida bekebun, kelimpah nambah pengelikun sereta pemujur kaul entara genturung pendiau,” ku iya ba program meri projek nya, ditu, Hari Tiga.

Nambah ke jaku iya, iya madah, pengudah jematan tu tembu ila sekeda jalai kebun mega deka digaga dikena ngemuntang peranak menua ngangkut asil betanam betupi sida.

Berebak enggau nya, Billy mega nyuaka projek nyeleti sistem paip graviti ke udah tembu di Kampung Sebako 1 enggau 2 beungkus RM688,850, ke digaga ari 17 Mac ngagai 16 September 2025.

Projek tu mujur nambah kualiti bekal ai beresi ngagai peranak menua, nyengkaum pengajar sereta nembiak SK Sebako.

Iya bela bejadika projek nyeleti sistem paip graviti Kampung Jantan Renggat keterubah ti beungkus RM450,000, ke digaga ari 28 Julai ngagai 27 Oktober 2025.

Renggat kedua projek nya deka ditampung enda lama agi enggau nambah belanja sepenyampau RM150,000 dikena nentuka tiap buah rumah ba genturung pendiau dia nerima bekal ai ti entap sereta beresi.

Kelimpah ari nya, pelilih Lundu deka nerima pemaik ari dua projek bekal ai ke digaga Perintah Sarawak iya nya Loji Meresi Ai Baru Lundu di Kampung Sedaing beungkus RM111.8 juta enggau Projek Nyambung Paip Ai Beresi Wilayah Lundu–Sematan beungkus RM143.9 juta ke disadang tembu manggai taun 2028.-EDISI UKAS