SIBU: Petroliam Nasional Berhad (PETRONAS) meri 60 unit kit Sains, Teknologi, Injiniring enggau Matematik (STEM) beungkus urung RM1.2 juta ke deka disadung ngagai sekula di selampur Sarawak berengkah Januari taun siti agi.

Sapit Menteri Pelajar, Inovasyen enggau Pemansang Penau Sarawak Datuk Dr. Annuar Rapaee madah, siti kit STEM nya beungkus RM20,000 ngagai RM25,000 ti ngundan lebih 50 item nyengkaum mikroskop enggau 'test tube', ke dikena ba pelajar Sains di sekula.

"Tu beguna bendar dikena nentuka perengka guna ba pelajar Sains di sekula ditu chukup," ku iya madah.

Iya nerang pekara nya sepengudah bejadika Hari Karnival STEM 2025 ba Sekula Primari (SK) Sungai Pasai, Hari Tiga tu tadi.

Iya mega madah, opis menteri iya diatu benung ngelangkar chara dikena nentuka pengawa nyadung enggau nguna Kit STEM ulih diatur enggau engkeman semua Opis Pelajar Pelilih (PPD).

"Bisi PPD ba mengeri nyangka enda chukup endur, nya alai, kitai ngelanggur beberapa buah sekula dipinta nyimpan enggau ngatur perengka guna ngambika sekula bukai bela ulih ngena tauka nyali maya ke diguna," ku iya madah baru. -EDISI UKAS