KUCHING: Perintah Sarawak ngatur aset enggau berurun sereta manah ke nyadi pengering ekonomi sereta nentu pengelantang dudi hari.

Premier Sarawak Datuk Patinggi Tan Sri (Dr) Abang Abdul Rahman Zohari Tun Abang Openg madah, pengawa nya bepelasarka tiga batang pekara iya nya nyimpan (saving), belanja ungkup guna (consumption) enggau meranak puku (investment).

"Ke beguna iya nya baka ni kitai ngatur aset. Penatai pemisi nengeri meseti diatur manah," ku iya madah.

Iya bejaku munyi nya maya Hari Integriti Bank Pemansang Sarawak (DBOS) ditu, Hari Satu.

Premier Sarawak nerang, sebagi ari penatai pemisi nengeri udah dipasuk ba Sovereign Wealth Fund dikena nentuka pengelantang rebak dudi.

Ku iya, pengawa ngatur aset mega bekaul enggau belanja ungkup guna rayat nyengkaum pelajar enda bebayar, pengelantang enggau sukung rama ti nyaup pengerembai ekonomi.

Bela datai maya nya Sapit Premier Sarawak Datuk Amar Douglas Uggah Embas, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, Chairman Sarawak Information System (SAINS) Datuk Patinggi Tan Sri Dr. George Chan Hong Nam, Menteri Pemansang Indu, Nembiak Mit enggau Pengelantang Komuniti Dato Sri Fatimah Abdullah, Menteri Pengangkut Sarawak Dato Sri Lee Kim Shin, Menteri ba Opis Premier Sarawak Dato Sri John Sikie Tayai, Sapit Menteri Pelajar, Inovasyen enggau Pemansang Penau Datuk Francis Harden Hollis, Chairman DBOS Tan Sri Datuk Amar Mohamad Morshidi Abdul Ghani, Tuai Pegawai Eksekutif DBOS Datu Laura Lee Ngien Hion sereta bala pemesai ke bukai.-EDISI UKAS