BETONG: Pemansang pelajar enggau raban nembiak ba Kunsil Nengeri (DUN) Layar majak disungkak ngena agih belanja RM245,000 nengah Projek Mit Menua Pesisir (MRP).

Ari penyampau nya, RM235,000 dipedua 11 buah sekula primeri enggau sekondri lalu RM10,000 agi diungkup ngagai Kelab Tenis Betong dikena nyaup gerempung nya ngatur program sida.

Sapit Menteri Raban Nembiak, Lumba enggau Pemansang Orang Dagang Sarawak Datuk Gerald Rentap Jabu madah, pemeri nya mandangka pengeransing iya ngenegapka agi sektor pelajar ti nyadi pugu pemansang modal mensia.

Iya ke mega Kaban Kunsil Nengeri (ADUN) Layar madah, Sarawak diatu begunaka orang gawa ti dinamik sereta betikas tinggi dikena nipak guna industri moden, seriris enggau tuju skim pelajar pechuma di nengeri tu.

"Nya alai, aku minta sekula lebih agi Kepala Pengajar meri penerang tumu ngagai nembiak senentang kuing tuju lebih agi peluang gawa ke bisi di Sarawak," ku iya madah.

Iya bejaku munyi nya maya pengawa nyuaka chek pemeri nya ditu, Hari Empat tu tadi.

Datuk Gerald mega madahka pemesai reti kerejasama apai indai, sekula enggau pengari rayat ba pengawa nentuka pemujur pemansang pelajar bala anak.

"Kitai meseti besaup senentang pekara tu. Besaup nempa pemujur nembiak ba pelilih Betong," ku iya madah baru.

Bekaul pelajar digital, iya ngarapka inisiatif meri tablet pechuma ngagai nembiak sekula sekondri ulih dikena enggau manah.

Kelimpah ari nya, iya ngansak bala pengajar bela bekenaka teknologi moden ngemujurka pengawa sida ngajar nembiak. -EDISI UKAS