Empat Projek Pemun Ngembing Transformasyen Bintulu-Samalaju Nyadi Hub Industri Gadung Asia
KUCHING: Sarawak deka ngaga empat iti projek taun tu dikena ngerumban transformasyen Koridor Industri Bintulu-Samalaju nyadi hub industri mimit karbon ti ngembuan pengulih besemekih, inovatif sereta puh.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Idar Kluster Industri (TIC) Bintulu deka nyadi pelasar ti ngempung industri, perintah enggau bakih teknologi sereta institusyen wang ba siti langkar kereja besaup dikena ngerumban transformasyen industri ba koridor nya.
Ku iya, inisiatif nya nyadi sebagi ari pemun bejalaika Strategi enggau Pelin Beresi Karbon Sarawak ke benung diputus dikena nentu kuing tuju ngemunas karbon.
"Bepun ari tu, kami udah mutus deka ngaga empat iti projek pemun berengkah ari taun tu.
"Projek keterubah deka lebih agi bekaul Operasyen Kilang Pintar ti bekenaka teknologi digital, data sereta pengulih industri.
"Projek kedua iya nya Hab CCU-H2 Sarawak ti nyerungkai pengulih chara ngena karbon betikas besai sereta pemansut karbon dikena nyungkakka agi pemansang komersial dua iti industri nya seraya ngerumban pemujur pengawa ngemunas karbon," pia ku iya.
Iya bejaku munyi nya maya Pengerami Ngelanchar TIC Bintulu, Kluster Keterubah Malaysia ba Forum Ekonomi Dunya ditu, Hari Empat.
Iya madah, projek ketiga deka bekaul ‘Industrial Symbiosis’, iya nya siti chara ngemuntangka kompeni bekunsika pun penatai, bekenaka teda industri ke nyadi input baru enggau nyungkak pengulih nengah ekosistem ekonomi idar ti lebih agi puh.
Nangkan nya, ku iya, ba projek keempat iya nya ‘Bintulu TIC Talent Initiative’ deka bekaul pengawa nyungkak pengelandik enggau latih baru orang gawa dikena nipak guna industri dudi hari nyengkaum sektor digital, ekonomi baru enggau industri mimit karbon.
"Kebuah pia laban infrastruktur enggau teknologi aja enda ulih ngubah ekonomi tang mengkang begunaka pengelandik mensia," ku iya madah baru.
Berindik ari nya, Premier Sarawak madah, semua empat iti projek nya deka nyadi pugu ngagai transformasyen timpuh lama ti deka ngangkatka Koridor Bintulu-Samalaju nyadi sebagi ari industri mimit karbon pemadu kompetitif di rantau Asia. -EDISI UKAS
