PERAK: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar, mujur datai ba Helipad 4, Markas Udara Tentera Laut Diraja Malaysia (TLDM), Lumut, Perak ngepunka penemuai gawa dua hari ke Markas Pangkalan TLDM Lumut enggau Lumut Naval Shipyard Sdn Bhd.

Penatai iya enggau bini, Toh Puan Datuk Patinggi Fauziah Mohd Sanusi urung pukul 9.50 pagi Hari Satu ti nepan helikopter diambat Panglima Soldadu Tasik, Laksamana Tan Sri (Dr.) Zulhelmy Ithnain, Sapit Panglima Soldadu Tasik (TPTL) Laksamana Madya Datuk Badarudin Taha enggau Panglima Armada Barat (PA Barat) Laksamana Madya Dato’ Baharudin Wan Md Nor.

Bela nyempulang TYT Sarawak iya nya, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah enggau bini, Datin Sri Zuraini Abdul Jabbar.

Nangkan terengkah ba Helipad 4 nya, Tun Pehin Sri Dr Wan Junaidi enggau Toh Puan Datuk Patinggi Fauziah disambut enggau sampi ti betuai ke Pegawai Pengarap Islam Markas Pemerintahan Armada Barat, Ustaz Mejar Azlan Abdullah, sebedau diberi Basa Istiadat Passing Guard, sebagi ari pengawa nyambut penatai seduai iya.

Sebedau ngepunka penemuai gawa, Tun Pehin Sri Dr Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi ngelawa Markas Panglima Armada Barat nerima Basa ‘Kawalan Kehormatan’ Utama.

Penemuai gawa nya disadang nyerangkung nemuai ngagai Pangkalan TLDM Lumut, Program Randau enggau anak Sarawak sereta Pengawa Meri Nama enggau Ngelanchar Kapal Tempur Pesisir 3 ti deka diatur kena Hari Dua.-EDISI UKAS

Pemberita: Leya Ameera Annuar Rigos