KUCHING: Penyarut geopolitik di Asia Barat ulih ngeruga rega minyak global belabuh diasai ke rayat, lalu meransang sida bekelimat ngatur belanja besehari-sehari enggau ungkus pengangkut.

Pekara tu dipeda bekaul enggau penyadi global ti ulih ngeruga rentayan bekal minyak, lalu meri empas ngagai rega minyak enggau belanja idup.

Siku pengereja kompeni, Yazid Ibrahim, 31, madah ke nyadi penguna ti ngena entukar ninting hari pulai mansang gawa, pekara nya chukup ngirau ke ati laban nya deka nambah belanja idup.

Ku iya, rega minyak ti niki mega meri empas ngagai rega barang.

“Lebuh ungkus pengangkut niki, orang dagang mega deka nikika rega barang lalu penguna ti deka ngasai ke empas. Nya kebuah, kitai endang patut bekelimat maya bebeli ke barang,” ku iya lebuh dirandau Unit Komunikasi Awam Sarawak (UKAS) kena Hari Lima.

Siku nembiak, Austin Carlos Bos, 26, mega ngaku ubah rega minyak meri empas ngagai pengawa besehari-sehari.

Ku iya, pengawa baka merambu pejalai enggau ngurangka aktiviti enda patut diatu dikemerat.

“Enti sebedau tu suah mindah jauh, diatu engka deka dikurang lalu meri perati ngagai pengawa bebeli ke barang ti patut aja,” ku iya.

Sepenemu, siku pengajar, Abdul Ilya’sa Azman, 27, ti madah ke pemesai guna merambu pejalai sereta ngurangka pengawa bebeli ke barang ti enda patut.

“Entara inisiatif beguna mutar penanggul krisis kuasa tu iya nya kitai merambu pejalai baka meseti ngemerat pejalai ti patut aja.

“Pia mega, kitai meseti nungkap baru bajet enggau ngurangka aktiviti beperindang sereta ngemerat pekara ti diguna enggau patut aja,” terang iya.

Nangkan nya, Zaid Alex, 31, mega irau ke faktor global baka keruga jalai minyak ti ulih ngeruga rega minyak menua.

“Enti pekara tu majak nyadi, ukai semina rega minyak niki tang mega sektor bukai baka renchit enggau barang basah mega deka tekeruga,” terang iya.

Taja pia, iya ngarap perintah ulih terus bejalaika inisiatif ti engkeman nentuka rega barang meruan dipatau.

Siku orang gawa perintah, Abdul Majid Azman, 37, mega madah, iya andal ke perintah deka nentuka bekal minyak terus tegap, tang nya bepanggai ngagai pengerembai ekonomi global.

“Pekara pemadu beguna, perintah meseti bisi perambu silik sereta mekanisme ti nemban nentuka pekara tu majak tegap,” ku iya.

Perintah udah bejalaika inisiatif proaktif nentuka penegap bekal kuasa menua terus dijamin.

Dulu ari nya, Sapit Menteri Besai, Datuk Amar Fadillah Yusof nyemetak madah, perintah udah nyendia pelin kontingensi nyengkaum ngulihka bekal ari makit altenatif nyema penanggul majak nyadi ngagai rentayan bekal ke bisi diatu. - EDISI UKAS

Pemberita : Nur Nabilla & Ezzah Syafiqah
Gambar : Nur Nabilla & Ezzah Syafiqah