Kapal Tempur Pesisir 3 Ngangkat Nama Bujang Berani Sarawak
LUMUT: Nama Bujang Berani Sarawak ke tebilang ngetan pengelikun menua menya diatu diangkat Kapal Tempur Pesisir 3 ti digagaka nama Sharif Mashor, kelai kaul sejarah lama enggau pengering moden ngetan menua.
Sejarah industri ngetan pengelikun menua nya diturai ba Limbungan Lumut Naval Shipyard Sdn. Bhd. (LUNAS), Pangkalan Soldadu Tasik Diraja Malaysia (TLDM) ditu, bela ngelai bebasaka Bujang Berani kelia.
Pengawa ngelanchar Kapal Tempur Pesisir 3 Sharif Mashor nya dipenyadi bini Yang di-Pertua Negeri Sarawak, Toh Puan Datuk Patinggi Fauziah Mohd Sanusi ke nyadi Lady Sponsor lalu dikemata Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar.
Bela datai maya nya Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Sapit Menteri Ngetan Pengelikun, Adly Zahari, Panglima Soldadu Tasik Laksamana Tan Sri Dr Zulhelmy Ithnain, purih Sharif Mashor, Wan Ahmad Makki Mashor Wan Abu Bakar Edruce sereta bala pemesai ke bukai.
Pengawa maya nya dirami enggau nyadaka 'sajak' ngading pemerani Sharif Mashor ti disempulang pantomim ari Raban Khas Tasik TLDM (PASKAL) berambaika Duku Ilang.
Toh Puan Datuk Patinggi Fauziah nangkan nya dipebasa bejadika pengerami ti bela disempulang enggau lagu Samudera Raya ari Pancaragam Palan TLDM.
Kapal Tempur Pesisir 3, sebuah kapal kelas Maharaja Lela ke digaga nitihka langkar korvet Gowind 2500 ari Naval Group lalu nyadi aset pemadu moden ba raban TLDM. -EDISI UKAS
