Kompleks SNCC Nambah Sukung Ngagai Raban Beguna Bantu Khas
KOTA SAMARAHAN: Sarawak deka numbuhka Special Needs Community Centre (SNCC), siti palan komuniti begempung keterubah baka nya ti meri sukung ngagai raban beguna bantu khas nyerangkung intervensi tumu, latih pengelandik, pemansang vokasional sereta nyaga timpuh panjai.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, projek beungkus RM30 juta ari baruh Langgur Pemansang Malaysia Lumpar Ke-13 (RMK-13) nya deka didiri ba taba Palan Penyuman Samarahan (PPS) dikena nambahka sistem sukung enggau pemansang komuniti beguna bantu khas di Sarawak.
“Kompleks tu digaga dikena nangkup utai diguna raban beguna bantu khas sekumbang sida idup. Tu bepun ari One-Stop Early Intervention Centre (OSEIC) ungkup nembiak mit biak ari tujuh taun ti diuji, diagnosis enggau intervensi tumu sebedau tama sistem pelajar formal, dientudi latih pengelandik enggau vokasional sereta orang ti nadai kaban belayan deka dijaga,” terang iya.
Iya nerang pekara nya ba aum media pengudah aum taba projek SNCC di Palan Penyuman OKU Samarahan, Hari Lima.
Iya madah baru, komponen pelajar formal nadai disedia ba palan nya laban servis nya udah bisi ba Opis Menteri Pelajar, seraya SNCC deka meri perati ngagai pemansang pengelandik, latih vokasional enggau peluang kereja ungkup raban beguna bantu khas.
Entara kus dilanggur ba renggat ngepun pengawa iya nya teknologi pemadah (IT), bejait, kulinari enggau pastri sereta seni enggau kraf ke deka diatur chara modular nitih penau penyereta.
Kelimpah ari nya, palan nya mega disikap buding ungkup penyereta ari luar Kuching enggau Samarahan, ngambi mayuh agi orang beguna bantu khas ari selampur Sarawak bulih akses ngagai servis disedia.
SNCC mega deka disikap perengkaguna pemun pemansang lumba dikena nyidi penau enggau ngerembaika pengulih atlit para nengeri tu, kelimpah meri peluang ungkup program nambah pengelandik enggau latih baru ungkup raban diselinting.
Projek SNCC mungkur blok opis, OSEIC ke disikap bilik terapi, bilik integrasi sensori enggau pegung hidroterapi, woksyop latih vokasional, buding pelatih kapasiti 64 iku sereta dewan taklimat enggau sheltered workshop.
Proses tinda projek ditaga dibuka Julai taun tu sebedau rega enggau surat setuju nerima diberi November.
Projek nya disadang pengelama 20 bulan lalu disadang tembu Mei 2028.
Sama datai, Senior Manager Strategic Engagement and Consultancy John Rizal Biki, Direktor Opis Pengintu Pengelantang Mensia Mayuh (JKM) Sarawak Semawi Mohamad, Arkitek Opis Kereja Raya (JKR) Vivian Wee, Tuai Unit Polisi enggau Projek, Opis Menteri Pemansang Indu, Nembiak Mit enggau Pengelantang Komuniti (KPWK) Rohana sereta Direktor Pengatur ke mega Arkitek RKD Architects Sdn Bhd Kushahrin Kushairy. - EDISI UKAS
