Datuk Amar Douglas Nampung Pejalai Ngabang Gawai di Betong
BETONG: Sapit Premier Sarawak ke mega Kaban Kunsil Nengeri (ADUN) Bukit Saban Datuk Amar Douglas Uggah Embas nampung pejalai Ngabang Gawai ke sekeda rumah panjai ba menua Betong, Hari Empat.
Pejalai nya mega disempulang Kaban Parlimen Betong, Dato Dr. Richard Rapu ke ngabang ngagai enam rumah panjai iya nya Rumah Panjai Selangking, Rumah Panjai Penyulok, Rumah Panjai Sungai Langit, Rumah Panjai Serudit A, Rumah Panjai Luban Ulu enggau Rumah Panjai Lempaong.
Penemuai bala pemesai disambut richah peranak dia ke ngintu Gawai Dayak enggau ati lantang sereta begulai bebaik.
Pejalai ngabang nya meri peluang ngagai Datuk Amar Douglas Uggah berandau enggau peranak sereta meri jaku selamat ngintu hari besai ngagai sida.
Iya mega ulih mending empu penemu enggau sada peminta rayat nentuka pemansang dilanggur meri pemaik ngagai rayat.
