KUCHING: Pengeransing nyaga pengelikun rampa menua majak disungkak nengah pengawa numbuh aplikasyen nyidi bansa orkid enggau pengawa meri lima buah basikal elektrik (e-bike) ngagai Sarawak Forestry Corporation (SFC) nengah kerejasama enggau Opis Kastam Diraja Malaysia.

Sapit Menteri Pengatur Mengeri, Tanah enggau Rampa Menua Sarawak, Datuk Len Talif Salleh madah, aplikasyen nya siti ari chara inklusif ti ngaul mensia mayuh besaup ngintu pengelikun biodiversiti nengeri tu.

"Naka ke diatu bisi 500 bansa orkid di Sarawak ke udah dipasuk ba aplikasyen tu.

"Semua ba Borneo bisi urung 1,300 bansa orkid lalu aplikasyen tu deka ngemuntangka mensia mayuh nemu bagi bansa orkid ke ditanam tauka orkid kampung," ku iya madah.

Iya nerang pekara nya maya dirandau media sepengudah bejadi SFC Digital & Green Initiatives “From Clicks to Cycles: Advancing SFC’s Digital & Green Agenda ditu, Hari Dua.

Iya mega madah, kerejasama ari mensia mayuh bela besai reti dikena nentu orkid semampai likun lalu meruan nyentuk ila.

Kelimpah ari nya ku iya, pengawa meri lima buah e-bike ngagai SFC bela disadang ngemujurka agi pengawa SFC lebih agi ba endur 'Totally Protected Areas' (TPA).

"E-bike tu deka dikena SFC bejalaika pengawa matau ba Taman Negara enggau palan jelu siga," ku iya madah baru.

Maya nya, iya mega beterima kasih ngagai Sarawak Orchid Society (SARORSO) ti diuluka Tengku Dr. Auvaroza ke udah ngayan pengeransing nyidi sereta nyaga pengelikun orkid dalam kandang semilan taun tu.

"Pengawa sida bela ngaul bala nembiak MRSM sereta mensia mayuh ke bukai di Kota Samarahan," pia ku iya.

Bekaul perambu deka ngena aplikasyen nya ba bansa utai tumbuh ke bukai, Datuk Len Talif madah, Opis Kampung Sarawak bela udah bisi aplikasyen nyidi bansa kayu.

Ba pekara bukai, iya madah, Sungai Tapang ke sebedau tu dikelala nyadi Timber Research Centre, udah dikemendar Kabinet Sarawak ngambika digazet nyadi Sungai Tapang Nature Reserve ti ngembuan 7.7 hektar pemesai.

Kelimpah ari nya, Kabinet Sarawak bela ngemendarka Bukit Siol Nature Reserve digazet lalu Matang Nature Reserve nyadi sebagi ari pemansang meruan negeri dikena nentuka pemansang mengeri sebela enggau pengawa ngintu pengelikun rampa menua.

Bela datai maya nya Kaban Kunsil Nengeri (ADUN) Kota Sentosa, Wilfred Yap Yau enggau Manijer Besai SFC, Abang Arabi Abang Aiman. - EDISI UKAS

Pemberita: Ezzah Syafiqah
Gambar : Mohd Hisyam Arif & Ezzah Syafiqah