WaveJak Dipenyadi, Revolusyen Ngenuku Identiti Orang Tuai
KUCHING: Sarawak nurai siti da inisiatif baru nuju digitalisasyen lebuh bejadika WaveJak, teknologi ngenuku identiti enggau enda ditegu bepelasarka Artificial Intelligence (AI) keterubah ba Malaysia, kelebih agi ngemuntang sereta negap pengelikun orang tuai.
Inisiatif empas besai nya dipenyadi Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi serimbai program Senior Citizen: We CARE for You di Balai Mayuhguna Taman Sukma, kena Hari Enam.
Menteri Pemansang Indu, Nembiak Mit enggau Pengintu Pengelantang Komuniti Sarawak, Dato Sri Fatimah Abdullah madah, WaveJak nya inovasyen kompeni teknologi menua, SOCOE Holdings Sdn Bhd, ti dikemansang nyadi chara mutar praktikal enggau likun, kelebih agi ungkup orang tuai.
Ku iya, teknologi Palm Vein AI nya ulih ngenuku identiti semina nengah scan urat tapa jari lalu nadai begunaka telefon pintar, kad tauka ditegu.
“Taja siku-siku engka enda ingat mai telefon tauka kerepai, tang sida bisi jari.
“Teknologi tu mega nyendia tikas pengelikun ti tinggi laban nemban nagang penyalah nipu tauka enchuri identiti,” ku iya.
Iya mega madah, teknologi nya udah mayuh dikena ba menua maju baka Emiriah Arab Bersatu, Jepun, Singapura, China enggau Korea, lalu nunjukka penemban ba renggat global.
Nangkan nya, Menijar Projek WaveJak, Nicholas Chan nerang ke sistem nya ngelala individu bisi besurik nyelai ba urat tapa jari, ngujungka likun agi dibanding chara konvensional baka MyKad, ngelala mua tauka chap jari.
“Penguna semina ngayanka jari ba scanner lalu sistem deka ngelala identiti bepelasarka chura urat ti nyelai.
“Scan tu bisi struktur dalam urat, ukai semina gambar mua aja, ngujungka nya tusah ditunda taja ngena gambar tauka 3D,” ku iya.
Ku iya baru, WaveJak deka dipejalai enggau integrasyen ngagai Kenyalang Gold Card (KGC) dikena ngemuntang orang tuai akses ngagai bemacham fasiliti lalu enda ibuh mai kad fizikal.
Sama datai, Sapit Menteri Pemansang Indu enggau Nembiak Mit Sarawak Datuk Rosey Yunus, Sapit Menteri Pemansang Pengelantang Komuniti Sarawak Datuk Mohammad Razi Sitam, Sapit Menteri di Opis Premier Sarawak (Undang-Undang, MA63 enggau Kaul Nengeri - Perintah Besai) Datuk Sharifah Hasidah Sayeed Aman Ghazali sereta Sekretari Mendam KPWK Nur Alina Abdullah @ Colliner Gohe. - EDISI UKAS
