SIBU: Projek ngaga Jalai Teku–Pasai–Kemuyang nyadi penyungkak pemansang infrastruktur enggau ekonomi menua ke majak diberi perati Printah Sarawak nentuka projek mujur nitih langgur.

Sapit Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Nangka, Datuk Dr Annuar Rapa’ee udah ngabas pejalai projek ngaga jalai nya kena Hari Dua tu tadi dikena nisih pemujur pejalai pengawa ngaga.

Projek ngaga jalai alun ti dipelanja Perintah Sarawak nya ngena belanja RM76 juta lalu disadang tembu ba September 2027.

Enti udah tembu ila, jalai nya deka ngemuntangka pejalai entara kandang Teku, Pasai enggau Kemuyang, kelimpah nyungkak pemansang kandang ngelingi sereta meransang pemansang ekonomi menua.

Maya nya mega, Datuk Dr Annuar tepantup ati meda pemansang projek naka tu lalu ngarap pejalai pengawa ngaga ulih ditembu nitih langgur ti udah ditetap ungkup guna rayat.-EDISI UKAS