KUCHING: Kerejasama lumba ensikal entara Sarawak enggau Indonesia majak ditegap nengah pengawa ngatur Borneo Cycling Odyssey 2026, ti ukai semina nyadi pelasar lumba tang mega nalan ngerapit kaul bakih seratantau ba Pulau Borneo.
Pengerami makai lemai serimbai program nya udah dipenyadi Sapit Menteri Nembiak, Lumba enggau Pemansang Orang Dagang Sarawak (Nembiak enggau Lumba), Datuk Gerald Rentap Jabu, sereta digulu Sekretari Mendam Opis Menteri Nembiak, Lumba enggau Pemansang Orang Sarawak, Dzulkornaian Masron, sereta Pemangku Tuai Pegawai Eksekutif Kaunsil Lumba Sarawak, Khairul Nizam Morshidi.
Lebuh bejaku, Datuk Gerald madah pengawa ngatur program lumba ensikal nya mandangka semangat penyerakup sreta kaul ti rat entara Sarawak enggau menua sepiak.
“Kitai ba Pulau Borneo tu siti rumpun. Program baka tu ukai semina meransang gaya pengidup bepengerai, tang negap kaul bebakih sereta kerejasama entara menua enggau entara rayat,” ku iya ba program nya di Royal Kuching Cruise, Waterfront Kuching, Hari Dua.
Iya mega madah pengawa ngatur achara lumba ensikal antarabansa baka nya ulih mai penguntung ngagai sektor dagang temuai enggau ekonomi menua.
“Penatai bakih ari menua bukai ke Sarawak ukai semina mandangka pemanah nengeri tu, tang meri pemaik ngagai ekonomi enggau komuniti menua. Tu mih pengawa lumba ti nyungkak penyerakup enggau pemansang,” ku iya.
Kelimpah ari nya, Basuki Raharjo meri terima kasih ngagai Perintah Sarawak udah ngelalu penatai bala penyereta ari Indonesia bela sama ngambi bagi.
“Kami endang ngasai semangat bekaban nya. Pengelelak maya lumba ensikal lenyau laban disambut enggau chukup manah ari kaban ba Sarawak,” ku iya.
Ku iya, bisi 20 pengayuh ari Indonesia ngambi bagi ba program tu, iya nya ari komuniti lumga ensikal nyengkaum ari Kalimantan Barat enggau Jawa, pia mega sebagi ari sida udah nembuka lumba 1,600 kilometer penyauh meling Kalimantan.
Berebak enggau nya, iya madah ke Federasi Sepeda Indonesia bisi niat ngerembaika kerejasama enggau Sarawak ba dudi hari, nyengkaum begulai ba pekit lumba ensikal ba Kalimantan Barat enggau Sarawak.
“Ba dudi hari, kami ngarap kerejasama tu ulih ditegap agi. Pesepeda ari Sarawak dikelalu ngambi bagi pekit ba Kalimantan Barat, lalu pesepeda kami deka ngulu program ensikal ba Sarawak,” ku iya.
Sama datai, Pegawai Turus Administrasyen Opis Pengatur IPK Sarawak, ACP James Jonathan, Tuai Federasi Sepeda Indonesia (FSI) Kota Pontianak, Basuki Raharjo, Presiden Gerempung Lumba Ensikal Nengeri Sarawak, Irawan Sudarsono, Sapit Tuai Polis Pelilih Kuching, Supt. Merbin Lisa, sereta Konsul Pekara Rama Budaya Opis Konsulat Jenderal Indonesia, Yasfitha Febriany Murthias, kelimpah pengari opis perintah enggau raban deligit.-EDISI UKAS
