BINTANGOR: Bisi 13 Projek Transformasyen Menua Pesisir (RTP) Taun 2026 ungkup sitak DUN Meradong udah dikemendar digaga nyengkaum projek nyeleti sereta nyeruri perengka guna sekula, masjid, rumah panjai sereta infrastruktur genturung pendiau.

Kaban Kunsil Nengeri (ADUN) Meradong Datuk Ding Kuong Hiing enggau nya datai ngabas taba semua projek nya ke digaga nengah Opis Kereja Raya (JKR) Bagi Menua Sarikei, Hari Tiga.

Maya nya mega, iya bisi mending kediri penemu sereta timbal ari raban sekula, komiti masjid sereta peranak rumah panjai.

Iya madah, penatai iya besai amat reti dikena nentuka tiap agih belanja ke diberi Perintah dikena enggau lurus sereta meri pemaik terus ngagai rayat menua.

“Pengawa ngabas baka tu deka betandu dikena nentuka pemansang ke diperambu endang amat meri pemaik ngagai rayat ba sitak Meradong,” ku iya.

Datuk Ding bela meri terima kasih ngagai JKR Bagi Menua Sarikei ti mega agensi pengatur ke pengeransing sereta kerejasama nentuka pemujur pejalai projek RTP di sitak DUN Meradong.

Sebagi ari projek tu, iya nya pengawa nyeleti Jalai Rumah Panjai Budol, Sungai Petai (RM50,000), nyeruri perengka guna Sekula Primari (SK) Petai (RM100,000), nyeleti perabung SK Ulu Meradong (RM100,000), Masjid Al-Muhajirin Taman Bintang, Bintangor (RM50,000) sereta nyeruri stadium Sekula Sekondari (SMK) Kai Chung (RM100,000).

Bela digaga iya nya pengawa ngemanah pagar SJK (C) Yong Kwong (RM50,000), nyeleti gelanggang basketbol SJK (C) Kung Cheng (RM50,000), perengka guna SMK Meradong (RM150,000), projek ba Rumah Ujih, Sungai Rayah (RM100,000), perengka guna Balai mensia mayuh enggau bilik ICT SK Rentap (RM50,000), nyeruri laman SJK (C) Hua Kee (RM50,000), balai mensia mayuh enggau nyambung karan baru SK Bukit Nibong (RM100,000) sereta nyeleti jalai enggau geladak Rumah Panjai Giman, Skim B Meradong (RM50,000).-EDISI UKAS