Menteri Raban Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah madah, semua bekaul nyengkaum kontraktor enggau agensi ngaga projek patut nentu semua projek tembu lalu nitih langgur ke udah ditetapka.
Ku iya, taja timpuh ngaga projek enda lama tang iya andal kontraktor ulih ngaga projek enggau mujur.
"Kitai nemu timpuh ngaga projek enda lama, urung semilan ngagai 12 bulan tang aku andal kontraktor ulih nembu projek. Nyema patut, sida mega tau gawa maya malam hari.
"Lumba tu besai reti. Ukai semina ngira nama Sarawak tang kitai mega ngira menua Malaysia," ku iya madah.
Iya bejaku munyi nya maya ngabas perengka guna lumba ditu, Hari Empat.
Ku iya, pemutus ngatur Lumba SEA 2027 di Sarawak siti pengawa ke besai ketegal keterubah iya lumba nya bisi diatur ba luar Kuala Lumpur.
Nya alai iya madah, perintah nengeri ransing nentu projek digaga enggau manah.
"Aku mega udah nyain jamin ke udah dianjung ngagai Kabinet Nengeri. Tu mandangka kitai endang bebendar deka meda lumba tu diatur mujur," ku iya madah baru.
Sekeda ari projek tu digaga ba Stadium Sarawak, Palan Akuatik Pandelela Rinong, Borneo Cricket Ground Sarawak, Palan Skuasy Petra Jaya, Palan Main Archery, Palan Nimbak, fasiliti petanque di Santubong, Arena Lawn Bowl Sarawak, gelanggang Gerempung Lawn Tenis Sarawak, Palan Latih Wushu enggau Stadium Perpaduan, Petra Jaya ungkup pekit gimnastik.
Semua 11 projek beungkus RM184,321,805 juta nya digaga nengah Opis Kereja Raya (JKR) Sarawak enggau Opis Lumba Sarawak (SSC).
Projek ke dilanggur berengkah suku keterubah enggau kedua 2026 nya disadang tembu suku keterubah enggau kedua 2027. -EDISI UKAS
Pemberita: Lonney Jinab Doris
Gambar: George S. Embie
