Direktor Unit Komunikasi Awam Sarawak (UKAS), Awang Putrayusrie Awang Redzuan madah, agi bisi mayuh bantu ba bidang pengelantang enggau pelajar ti dibedau dipinta rayat.
Ku iya, tanggungpengawa tuai genturung pendiau, gerempung ukai dikuasa perintah (NGO) enggau agensi perintah besai amat reti nentuka penerang bekaul bantu datai ngagai raban ti begunaka bantu.
“Bantu udah disedia, tang agi mayuh bedau minta laban enda nemu.
“Nya alai, semua raban patut megai tanggungpengawa nabur penerang tu,” ku iya maya bejaku ba Program Juh Ngopi Ngan UKAS di Tatau, ditu, Hari Empat.
Kelimpah ari nya, Awang Putrayusrie bela meransang rayat ngena media rama enggau manah lalu enda mudah ninga ke penerang ti enda betul.
Ku iya, pengawa nabur berita bula, gambar tauka video ti nipu, nyengkaum ngena Artificial Intelligence (AI), tau ngasuh saru sereta ngeruga pengelantang rayat.
“Bala mayuh patut meresa pemetul penerang sebedau pechaya sereta nabur penerang nya ngambi enda saru,” ku iya.-EDISI UKAS
