Pekara nya dipadah Sapit Premier Sarawak Datuk Amar Douglas Uggah Embas seraya madah ke pemansang Sarawak diatu deras dikemansang nyengkaum ngaga lapan jematan taun nyin tadi enggau semilan da projek jematan ti deka tembu taun tu lalu nambahka penatai pemisi nengeri ti majak entap.
“Penyerakup rayat Sarawak ti tegap nyadi pugu pemujur pemansang nengeri, seraya nentika mayuh bantu perintah diagih ngagai semua raban diselinting, ari orang bumai enggau nembiak nyentuk orang tuai sereta raban kurang penatai pemisi,” ku iya.
Iya madah munyi nya lebuh bejadi Program Outreach KPWK Begulai Enggau Bakih Strategik: "Kamek Prihatin, Kitak Penting" Zon Betong Tahun 2026 di Balai Komuniti Spaoh kena Hari Enam.
Sama datai, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, Sapit Menteri Pengelantang Komuniti Sarawak, Datuk Mohammad Razi Sitam, Kaban Parlimen Betong, Dato Dr Richard Rapu, Kaban Kunsil Nengeri (ADUN) Beting Maro, Dato Razaili Gapor enggau ADUN Kalaka, Mohammad Duri.
Nya kebuah, iya nyemetak madah ke sukung rat komuniti ba Betong ngagai Premier Sarawak, Datuk Patinggi Tan Sri Abang Abdul Rahman Zohari Tun Datuk Abang Openg ti bejalaika mayuh polisi enggau program beguna amat nentuka nadai rayat ti kena tinggal ari arus pemansang nengeri.
Iya andal ke nengah penyerakup ti tegap sereta kerejasama semua raban, mayuh program enggau projek pemansang ti dilanggur perintah nengeri deka terus dipejalai nemban agi ke pengelantang rayat Sarawak.
Lebuh bejaku, iya ti mega Menteri Pekara Wang enggau Ekonomi Baru II meri terima kasih ngagai semua bakih strategik nyengkaum Chairman Sarawak Digital Economic Corporation (SDEC) ti begulai ngemujur program nya seraya ngarap mayuh agi fasiliti pemansang baka kampus tetap CENTEXS ulih ditumbuh ba Betong dudi hari.
Ku iya, program outreach tauka ngaul komuniti nya besai reti ba rayat laban mayuh pengawa diatu ulih diputar lengkas enggau muntang agi.
Tu nyengkaum raban bekaul ulih nerima terus Kenyalang Gold Card ba hari program nya nyadi kelimpah atur nukar adres ba tingki ti ulih diadu ba timpuh pandak nengah agensi bekaul ti bisi datai.
Bisi mega disediaka servis beperesa pengerai ngambi meri pemaik ngagai komuniti lokal.
Berebak enggau nya, sekeda peminta mega dibantai, nyengkaum perambu numbuh Betong One-Stop Early Intervention Centre (OSEIC), atur ngerumban peminta bantu ngintu pengelantang sereta nambah akses teknologi ba peranak menua pesisir.
Bisi mega diatur Simbolik Nyua Hamper Sejambak Kasih Taun Baru China enggau Simbolik Nyua Inisiatif Perintah Sarawak baka Bantu Indai Baru Beranak (BIS), Endowment Fund Sarawak (EFS), Kenyalang Gold Card (KGC), Senior Citizen Health Benefit (SCHB) enggau Bantu Berubat. - EDISI UKAS
