Sapit Menteri Dagang Antarabansa, Industri enggau Pengawa Meranak Puku Sarawak ti mega Kaban Kunsil Nengeri (ADUN) Batang Ai, Datuk Malcolm Mussen Lamoh madah, tuai bisi integriti enggau akauntabiliti entara Tuai Raban Bansa enggau Tuai Komuniti (KMKK) meseti terus nyadi budaya.

Bejaku ba randau begulai enggau peranak ba Rumah Edat Intan, Lubok Subong, Lemanak, iya ngingatka pangku pengawa ti disan meseti dipejalai enggau penuh tanggungpengawa ke pemaik rayat ba renggat baruh.

Iya mega nyebut status projek Klinik Lubok Antu lalu ngarap ke projek nya ulih digaga nitih timpuh ti ditetapka nentuka peranak bulih fasiliti pengerai ti menyana agi.

Kelai komitmen ngagai pemansang komuniti menua pesisir, iya mega ngemendar agih belanja Projek Mit Pemansang Menua Pesisir (MRP) ngagai sekeda gerempung enggau genturung pendiau ba sitak nya nyengkaum JKKK Lubok Subong, Gerempung Indu Lubok Subong, sekeda genturung pendiau ngelingi Nanga Kesit sereta PIBG SK Nanga Kesit enggau Kelab Rekreasyen Klinik Nanga Kesit.

Randau nya nunjukka pengeran perintah nentuka sada rayat terus didinga sereta peminta komuniti menua pesisir diberi perati nengah inisiatif ngundang enggau randau begulai enggau komuniti.

Sama datai, Pegawai Pelilih Lubok Antu, Akoi Ejau, Kaban Kaunsil Pelilih Lubok Antu (MDLA) sereta KMKK Pelilih Lubok Antu.-EDISI UKAS