KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi meda second quarter final Piala Malaysia entara Kuching City FC dan DPMM FC di Stadium Negeri, malam tadi.

Penatai TYT enggau Toh Puan urung pukul 8.30 malam diambat Presiden Kuching City FC ti mega Tuai Sekretari Politik Premier Sarawak, Dato Fazzrudin Abdul Rahman.

Sama datai, Konsul Jeneral Negara Brunei Darussalam, Sheikh Abdul Mahdani Dato Paduka Sheikh Abdul Gani, Tuai Pegawai Eksekutif Kuching City FC, Iswandi Ali Hassan begulai enggau bini, Dayang Siti Aisyah Mohd Atai sereta temuai bukai.

Bisi mega meri sukung iya nya Sekretari Mendam Opis Menteri Nembiak, Lumba enggau Pemansang Orang Dagang Sarawak, Dzulkornain Masron sereta Pemangku Tuai Pegawai Eksekutif Sarawak Sports Corporation, Khairul Nizam Morshidi.

Penatai TYT enggau Toh Puan diambat lebih 10,000 penyukung enggau panjung ti nedatka Stadium Negeri ngambi meri sukung rat ngagai kededua tim.

Maya belelak ba first half, TYT enggau Toh Puan ngulu pengawa bejalai bebala mayuh‘A March of Unity’ ngelingi stadium seraya ngepai bala penyukung begulai enggau Dato Fazzrudin Abdul Rahman, disempulang temuai dipebasa sereta raban pancharagam ari SMK St. Joseph Kuching.

Pengawa nya nurai sejarah baru pengudah keterubah iya TYT enggau Toh Puan meda pekit main bol ba Stadium Negeri begulai enggau beribu penyukung lalu meri peluang ngagai rayat meda tuai nengeri nya semak agi.

Ba pekit nya, tim tuai rumah, Kuching City FC ngalahka DPMM FC 3-1 enggau bulih agregat 6-2 ngambi ulih tama ngagai semifnal Piala Malaysia.

Sebedau mupuk pulai, TYT enggau Toh Puan meri tabi puji ngagai Dato Fazzrudin Abdul Rahman sereta semua tim Kuching City FC ke pemujur nya lalu besampika tim ti ngari ke Sarawak terus nyulut enggau ngerebut gelar champion Piala Malaysia musin tu. - EDISI UKAS

Gambar : Astana Sarawak