Sapit Menteri Pemansang Orang Dagang enggau Koperasi Datuk Mohamad Alamin madah, skim belanja khas ti disedia Opis Menteri Pemansang Orang Dagang enggau Koperasi (KUSKOP) nengah Tabung Ekonomi Kumpulan Usaha Niaga Nasional (TEKUN Nasional) nya mega nyendia atur peminta ti muntang sereta atur ngemendar ti lengkas.
“Kitai minta semua orang dagang datai ngulihka agih belanja tu enggau atur ti minimal aja iya nya lisin bedagang, salin tingki enggau salin bank.
“Kitai mega ngasuh TEKUN ngadu sereta ngagihka jali ba timpuh lima hari gawa,” ku iya madah ngagai pemberita pengudah bejadi Pengawa Bejual MADANI Koperasi & Orang Dagang (JMKU) ditu kena Hari Satu.
Ku iya, naka diatu urung RM14 juta udah diagih ngagai 2,010 iku penyali ba selampur menua lalu Sarawak ngerikod urung 80 penerima.
Iya madah, penyampau penerima ba nengeri tu deka terus ditambah lalu opis menteri sedia berandau nambah agih belanja nyema diguna.
“Peminta skim nya agi dibuka nyentuk 15 March tu enggau dibuka ngagai bemacham dagang nyengkaum orang dagang bazar Ramadan, bejual kuih raya tauka pemakai rumah, restoran sereta kedai," ku iya madah baru. - EDISI UKAS
