KUCHING: Pengawa ngatur pengerami ngelalu pengabang serimbai Taun Baru China (TBC) mandang semangat peneguh penyerakup rayat ba Sarawak.
Sapit Premier Sarawak Datuk Amar Prof Dr Sim Kui Hian madah, pengerami ngelalu pengabang ba Sarawak nyengala mai reti ngelalu serap komuniti nadai ngira raban bansa enggau pengarap datai begulai ngintu pengerami nya.
“Tu mih ti disebut pemansang Sarawak ke alai semua orang datai berami begulai.
“Pemansang Sarawak ukai ngasuh pambar enggau ukai pasal polarisasyen kelalu enggau mega ukai pasal politik belama,” ku iya.
Iya madah munyi nya lebuh dirandau pemberita lebuh ngabas ke rumah Kaban Kunsil Nengeri (ADUN) Batu Kitang, Dato Ir Lo Khere Chieng kena Hari Tiga.
Kaban Kunsil Nengeri (ADUN) Batu Kawah nya mega madah, lima taun ke deka datai beguna endar ungkup Sarawak berindik ari nengeri tu benung deras mansang.
Nya kebuah, ku iya, beguna endar rayat Sarawak terus ngetan semangat beserakup tu lalu Taun Baru China mih awak ngenatai pekara ti manah.
“Arap pekara positif tu, naratif positif tu ulih diterus sepanjai taun laban lebuh kitai mai pekara ti positif, nya beguna amat dikena ngemansang menua,” terang iya.
Sama datai, Ahli Dewan Negara Senator Dato Ahmad Dato Sri Ibrahim enggau Chairman Kaunsil Pelilih Padawan Cr Tan Kai. -EDISI UKAS
Pemberita : Ahmad Daniel Faiz
Gambar: Alezxandria Kapple (ST)
