BUKIT BEGUNAN: Semangat bebaik enggau beserakup terus dipandang ba DUN Bukit Begunan lebuh Kaban Kunsil Nengeri (ADUN) Bukit Begunan, Datuk Mong Dagang ngundang komuniti China serimbai pengerami Taun Baru China.

Iya enggau bala bukai udah ngabang ngagai sekeda ruang bilik di Bangkong, Entulang Bungkang, Entulang Jambatan enggau Entulang Engkalat lalu penatai iya disambut ati gaga enggau lantang.

Sekumbang ngabang, Datuk Mong bisi limpang ngerandau, nanya berita enggau meri Selamat Taun Baru China ngagai bala dia.

Ku iya, pengerami ngintu hari besai pupu bansa di Sarawak ukai semina tradisyen budaya aja, tang nyadi pelasar besai negap kaul, meri pemereti ati enggau narak ulah bebasa entara komuniti.

Ngabang serimbai hari besai nya mandangka iya seruran ngundang rayat nadai ngira raban bansa enggau pengarap, seriris enggau juluk ati negap penyerakup enggau pengelantang ba sitak DUN Bukit Begunan.–EDISI UKAS