NGEMAH: Projek infrastruktur nyengkaum servis feri berega RM4.5 juta sereta ngaga jalai baru nyadi penyungkak pemansang enggau pengelantang rayat sitak Kunsil Nengeri (DUN) Ngemah.

Kaban Kunsil Nengeri (ADUN) Ngemah, Anyi Jana madah, perengkaguna feri ti disedia meri pemaik besai ngagai peranak menua nya, kelebih agi ari sukut pemansang enggau aktiviti ekonomi ninting hari.

“Servis feri tu mantu ngemuntangka rayat ditu mindah sereta nambah akses entara genturung pendiau, lalu nyukung aktiviti ekonomi peranak Ngemah.

“Pengawa tu nipak ke perintah keran nentuka perengkaguna ti disedia endang meri empas terus ngagai pengidup rayat,” ku iya lebuh Program Ngabang Taun Baru China ditu, Hari Tiga.

Anyi madah baru, siti agi projek pemansang iya nya ngaga jalai tujuh kilometer pemanjai di Simpang Nanga Jagau ti deka digaga enda lama agi nengah Agensi Pemansang Kandang Menua Tengah Rajang (MiRRDA).

“Projek jalai tu disadang nambah akses menua enggau ngelantangka pengawa rayat besehari-sehari, lalu nyukung pemansang berenggat di Ngemah,” ku iya.

Berebak enggau nya, iya nyemetak madah ke program ngaul komuniti baka Ngabang Taun Baru China beguna endar dikena ngetan penyerakup enggau pengelantang pupu bansa di menua nya.

“Program baka tu ukai semina ngerapit kaul aja, tang mega nyadi dipelasar negap kerejasama entara bala bukai enggau rayat ti diau bebaik,” tandu iya.

Ba program nya, Anyi mega bisi ngungkupka agih belanja RM3,000 ngagai Komiti Pemansang enggau Pengelikun Genturung Pendiau (JKKK).-EDISI UKAS