TATAU: Pengeran Perintah Sarawak ngedut takah pemansang menua pesisir terus ditegap lebuh sekeda projek nengah projek Program Transfomasyen Menua Pesisir (RTP) ba sitak Kakus mujur digaga sereta ngubah pengidup komuniti.
Menteri ba Opis Premier Sarawak, Dato Sri John Sikie Tayai madah, pejalai projek nya mandangka pengeran perintah nentuka genap langgur pemansang amat meri empas ngagai pengelantang rayat ba renggat baruh.
Ku iya, pemansang ti dilanggur ukai semina nyendia perengkaguna pemun, tang mega dipejalai chara berurun enggau ngemerat sukung pengelikun, pengelantang enggau pemansang ekonomi komuniti menua pesisir.
“Projek tu ukai semina perengkaguna fizikal tang mega nyamin pengelikun sereta ngemujur pejalai peranak mindah ungkup atur ekonomi enggau akses ngagai perengkaguna pemun,” terang iya.
Ba pejalai ngabas seraya gawa ngelingi Tatau kena Hari Enam, iya ngabas pengawa nyeruri Jematan Nanga Sidang ti diatur udah tembu enggau ulih ditengah peranak dia.
Dato Sri John Sikie nyemetak madah, pengawa matau deka terus dipejalai nentuka genap projek RTP mujur nitih taga ti ditetapka lalu enda ngeruga sukut kualiti enggau standard.
Sama nyempulang iya nya Residen Bagi Menua Bintulu, Datu Nyurak Keti. -EDISI UKAS
