BETONG: Tanggungpengawa indu ba pemansang komuniti majak ditegap nengah pengawa ngatur Program Merarau serimbai ngintu genap ke-19 Biro Indu Penurin ba Rumah Sibat Banyan, Penurin, ditu, Hari Enam tu tadi.

Program ke diatur Biro Indu Penurin enggau Komiti Pemansang enggau Pengelikun Genturung Pendiau (JKKK) Penurin nya nyadi nalan alai ngumpul belanja gerempung dikena nyaup perambu sereta program ninting taun sida, kelimpah nyungkak ulah kerejasama peranak menua nya.

Sapit Menteri Nembiak, Lumba enggau Pemansang Orang Dagang ti mega Kaban Kunsil Nengeri (ADUN) Layar, Datuk Gerald Rentap Jabu madah, penyakah raban indu ngatur program komuniti ulih nyaup pemansang rama sereta ekonomi kandang menua.

Iya madah munyi nya lebuh bejadika program nya, lalu ngungkup belanja RM5,000 ngagai JKKK Penurin nyadi kelai sukung ngagai program nya.

Kelimpah ari nya, Kaban Parlimen Betong, Dato Dr. Richard Rapu ba jaku iya madah, Biro Indu nyadi pugu pengering sesiti JKKK lalu patut majak ditegap setipak enggau pengeransing nyungkak tikas ekonomi enggau pelajar rayat.

Maya nya mega, Dato Dr. Richard bela ngungkup RM5,000 ngagai Biro Indu Penurin.

Program nya bela dirichah enggau macham program nyengkaum bejual tiket mija merarau, tiket benasit, melah kek sereta pemerindang bukai.

Bela datai ngerichahka agi program iya nya Tuai Rumah Panjai Penurin Sibat Banyan, Tuai Biro Indu Penurin Demei Luta, Pegawai UKAS Bagi Menua Betong Tony Malang Chabu, Tuai Gereja St Augustine Betong Father Rentap Nuang sereta Kaunselor Tebari Megong.-EDISI UKAS