LHDN Negap e-Invois Renggat 4, 10,000 Kompeni Ba Sarawak Bekaul
KUCHING: Opis Asil Dalam Nengeri (LHDN) majak ngenegap agenda digitalisasyen sistem chukai menua nengah inisiatif e-Invois ke diatu ba Renggat 4, ti ngaul urung 10,000 kompeni di Sarawak.
Tuai Pegawai Eksekutif LHDN, Datuk Dr Abu Tariq Jamaluddin madah, pejalai renggat pemadu baru nya sebagi ari inisiatif transformasyen chukai dikena nambah pengelurus, penyikar sereta nitih atur chukai ba kompeni.
“Kurang lebih 10,000 kompeni ba Sarawak ke ba Renggat 4 deka ngambi bagi ba inisiatif e-Invois tu,” ku iya.
Iya madah munyi nya maya aum media pengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, di Kompleks Satria Pertiwi, Hari Tiga.
Ba renggat nasional, semak 200,000 kompeni selampur Malaysia udah ngena e-Invois, enggau penyampau dokumen digital ke diterima diatu ngelui satu bilion.
Ku iya, kelimpah e-Invois, LHDN mega meransang kompeni ngambi bagi ba program ‘Tax Corporate Governance’, iya nya kerejasama strategik entara agensi nya enggau sektor korporat dikena nentuka atur sereta ripot chukai ba tikas pemadu manah.
Nerang bekaul akses e-Filing lebih agi ba kandang menua pesisir, iya madah, LHDN nyendiaka bantu nengah rentayan opis enggau opis satelit ba selampur Sarawak.
“Enti bisi penanggul nganjung, opis ba selampur Sarawak sedia mantu ngenang sistem e-Filing ke udah lama dikena lalu tikas nitih atur nya mega tinggi, sida ke agi napi penanggul tau datai ngagai opis tauka opis satelit di selampur negeri,” ku iya madah baru.
Maya penemuai basa nya, Datuk Dr Abu Tariq bela nerang ngagai Datuk Patinggi Abang Zohari bagi raban tuai LHDN Sarawak ke diatu betuaika Abang Ehsan Abang Abu Bakar ti nyadi Direktor HASiL Sarawak.
Sama datai, Sapit Tuai Pegawai Eksekutif (Ngatur) LHDN Datuk Ahmad Khairudin Abdullah. -EDISI UKAS
