Yang di-Pertua Negeri Sarawak Nerima Penemuai Basa PVATM
KUCHING: Yang di-Pertua Negeri Sarawak Tun Pehin Sri Dr Wan Junaidi Tuanku Jaafar nerima penemuai basa ari deligit Kaunsil Besai Gerempung Veteran Raban Soldadu Malaysia (PVATM) ditu, Hari Tiga.
Tuju penatai deligit ti betuai ke Penyanding Penemu Gerempung Mej Dato’ Peter Runi (B) dikena madahka rintai raban tuai baru gerempung nya.
Penatai sida mega mantaika langgur minta Yang di-Pertua Negeri Sarawak nyadi Patron PVATM Sarawak nitih Undang-Undang Malaysia sereta baka ke digaga nengeri bukai.
Kelimpah ari nya, penemuai basa tu bela nyadi pelasar alai sida ngulihka sanding penemu bekaul tanggungpengawa enggau aktiviti komuniti PVATM.
Tun Pehin Sri Dr Wan Junaidi enggau nya meri terima kasih ke pengawa raban veteran nyaga menua sereta ngarap gerempung nya majak mujur.
Sama datai, Yang Dipertua Gerembung Jimbau Galu, Sapit Yang Dipertua Gerempung Kapt Hadzill Awi (B) sereta kaban komiti Philipsen Jeff Talot, Edwin Jarau enggau Garid Sunang. -EDISI UKAS
