PULAU BRUIT: Pelatih Sarawak Centre of Performance Excellence (SCOPE) bisi peluang bulih peneleba bekaul atur menua pesisir ke bendar nengah pengawa ngabas sekeda projek pemansang ba sitak Kunsil Nengeri (DUN) Semop, Hari Tiga.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, pengawa meda kediri nya meri penemu ngagai pelatih bekaul tanggungpengawa pengari rayat merambu sereta matau pejalai pemansang ba menua.

Iya ke mega, Kaban Kunsil Nengeri (ADUN) Semop madah, penemuai nya ngulihka pelatih meda kediri pejalai atur genturung pendiau, atur projek mit enggau jelan pemesai sereta chara ngenatai servis perintah terus ngagai rayat.

“Aku ke nyadi pengari rayat begulai enggau Palan Servis DUN Semop sereta iring tuai genturung pendiau ngelaluka penatai pelatih biak tu meda kediri pengari rayat, tuai genturung enggau pengari agensi perintah gawa ngatur macham pekara bekaul guna enggau ngintu pengelantang rayat,” ku iya.

Iya madah munyi nya maya dirandau media pengudah ngatur pengawa ngabas palan projek Transformasyen Menua Pesisir (RTP) ba Pulau Bruit.

Datuk Abdullah mega madah, sepemanjai dua hari ngabas menua enggau iya, raban pelatih meda kediri pengawa siku pengari rayat ke patut seruran ngundang rayat, berati isu ba menua sereta matau pemujur projek pemansang.

Ke penemu mayuh, dalam timpuh latih setaun, pelatih deka nitih macham modul praktikal, nyengkaum belajar prosedur atur perintah ba menua pesisir enggau mekanisme pejalai projek pemansang ari agensi bekaul.

Maya belatih ba UKAS, raban pelatih belajar ngatur media, peragam mensia mayuh sereta chara ngenatai penerang perintah nengah chara ti efektif.

Ba pengawa ngabas menua nya, Datuk Abdullah ngabas tujuh palan projek ba tujuh genturung pendiau di Pulau Bruit disempulang pegawai Opis Pelilih Menua, Opis Kereja Raya (JKR) enggau lapan iku pelatih SCOPE.-EDISI UKAS