PANTU: Chalun Tuai Raban Bansa nyengkaum Tuai Rumah patut likun ari penyalah bekaul Polis Diraja Malaysia (PDRM) enggau Opis Nyeliah Penyalah Makai Suap Malaysia (SPRM) dikena nentuka integriti iring tuai komuniti meruan dijaga.

Kaban Kunsil Nengeri (ADUN) Bukit Begunan, Datuk Mong Dagang madah, tuju inisiatif nya dikena nentuka tuai komuniti nadai rikod penyalah enggau penyalah makai suap.

“Proses nisih deka diatur berengkah ba renggat pun maya nerima nama chalun KK. Raban polis deka nisih asal penatai pengelikun chalun nya lalu SPRM deka meresa integriti sereta isu makai suap.

“Enti nadai penyalah baru chalun nya dikemendar menteri tauka raban bekuasa nengeri dichiri. Enggau proses tu baru peranak menua ngembuan siku tuai komuniti ti ulih dikeandal,” ku iya.

Iya madah munyi nya maya bejadika Program Nyua Surat Chiri sereta Nampung Pengawa Tuai Komuniti enggau Tuai Raban Bansa (KMKK) DUN Bukit Begunan ditu, Hari Empat.

Maya nya, iya mega ningkah penemu ti madahka ADUN bisi enggau nentuka chalun Tuai Rumah.

“Penemu nya enda betul laban ADUN baka aku ukai ngelala sapa ke dipilih kita (peranak menua rumah panjai) nyadi Tuai Rumah kita.

“Pengawa kami nyukung. Taja pia, peranak rumah panjai patut milih chalun Tuai Rumah ke patut, ngambi iya ulih nyadi tuai sereta nyaga pemansang pengidup sida enggau mujur agi,” ku iya.

Maya nya, Datuk Mong ngungkup RM50,000 belanja nengah Program Transformasyen Menua Pesisir (RTP) ngagai Komiti Pemansang enggau Pengelikun Genturung Pendiau (JKKK) Selanjan Jalong dikena ngaga jalai tauka stor.

Iya mega ngagih belanja Projek Mit Menua Pesisir (MRP) sepenyampau RM10,000 ngagai JKKK Selanjan Jalong sereta RM4,000 ngagai biro indu rumah panjai nya.

Bisi 22 Tuai Rumah enggau tiga Penghulu ari Kara-Selanjan ditampung gawa ba program nya, lalu dua agi Tuai Rumah baru dichiri.-EDISI UKAS