SIBU: Universiti Teknologi Sarawak (UTS) nampung tradisyen Ramadan nengah pengawa nyadung 500 bekas bubur lambuk ngagai mensia mayuh ba Dataran Tun Tuanku Bujang Fasa Dua, kena Hari Lima.
Mandal Chanselor UTS, Profesor Datuk Dr Khairuddin Abdul Hamid madah, sepenyampu 700 kuntina bubur lambuk disedia asil kerejasama Surau Pusat Islam UTS begulai enggau Gerempung Indu UTS serimbai program nya.
“Ari penyampau nya, 500 kuntina disadung ba endur tu seraya 200 da dsadung ba endur bukai nyengkaum ngagai orang kampar lalu sida ti kurang penatai pemisi ti nyadi perati besai ba program nya,” ku iya.
Ku iya, program manduk enggau nyadung bubur lambuk nya aktiviti ninting taun universiti tiap kali Ramadan nya kelai penyiru ngagai komuniti lokal.
Taja pia, ku iya, bisi pengelain taun tu lebuh endur nyadung dipindah dibanding sebedau tu ti diatur ba Kampung Bandung.
“Berindik ari endur nya benung diseruri, raban universiti setuju mindahka program ngagai endur baru tu.
“Ubah tu mega meri peluang ngagai komuniti ba endur bukai mega ngasai ke inisiatif UTS ngaul komuniti sepanjai Ramadan,” ku iya.
Iya mega madah, pengawa milih endur besemak bazar Ramadan mega ngerichah kelimpah ngemuntang mensia mayuh bulih pemakai buka puasa.
Kelimpah ari nya, iya meri terima kasih ngagai semua raban nyengkaum serikat kompeni enggau orang ngati kediri ti semampai nyukung sereta begulai ngemujur program nya tiap kali Ramadan.-EDISI UKAS
