KUCHING: Penatai Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi ngabang ngagai Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah ukai semina ngabang aja tang bela mai pengaga ngagai ruang bilik ti begunaka bantu.

Penatai seduai urung pukul 11 pagi disambut Dato Sri Fatimah enggau laki, Datu Dr Adi Badiozaman Tuah sereta sida sebilik ke bukai.

Awak nya dikena Toh Puan Fauziah nyua pemeri kamera beungkus RM5,000 ngagai siku indai tunggal, Nor Karmira Benny Karmilan nengah Program Low Income Family Empowerment (LIFE) ari Opis Menteri Pemansang Indu, Nembiak Mit enggau Pengelantang Komuniti (KPWK).

Pemeri nya dikeandal ulih nyaup Nor Karmira nambah penatai pemisi ruang bilik iya.

Kelimpah ari nya, anak Nor Karmira bela nerima duit raya ari Toh Puan Fauziah.

Sama bisi datai ngabang maya nya Sapit Menteri ba Opis Premier Sarawak (Pengatur Projek ungkup Agensi Pemansang Kandang Menua, Dewan Bandaraya Kuching Utara enggau Pekara Islam), Datuk Dr Abdul Rahman Junaidi enggau Direktor Opis Pengintu Pengelantang Mensia Mayuh, Semawi Mohamad. -EDISI UKAS