Sarawak Negap Inisiatif Berumah, Meri Perati Ngagai Akses Belanja enggau Rayat Ngempu Rumah
KUCHING: Perintah Sarawak terus negap agenda ngempu rumah enggau meri perati ngagai isu akses belanja sereta nentuka rayat ngempu rumah.
Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal Sarawak Datuk Amar Profesor Dr. Sim Kui Hian madah, agi tubah raban ti ulih ngempu rumah tang napi penanggul ngulihka jali ari institusyen wang.
“Bisi ti ulih meli rumah tang enda ulih ngadu jali bank laban nadai gaji tetap lalu ditu mih pangku pengawa Mutiara Finance nyaup kes baka tu,” ku iya.
Iya madah munyi nya lebuh dirandau pemberita pengudah bejadi Pengawa Ngelanchar Mutiara Open Day 2026 di Dewan Rafflesia, HDC, kena Hari Enam.
Ku iya, isu besai berumah ba Sarawak ukai suntuk unit tang penyebela agih ketegal faktor migrasyen sereta ngempu rumah ngelui ari siti.
“Taja penyampau rumah chukup, isu besai iya nya agih enda sebela lalu bisi ti ngembuan lebih ari siti rumah tang agi mayuh ti bedau bisi rumah,” ku iya.
Iya nyemetak madah ke inisiatif perintah nentuka pengawa ngempu rumah ulih dijapai ngelui serap umur.
“Kitai deka rayat bisi rumah tumu nentuka jali ulih dibayar sebedau umur majak tuai tang kitai mega nyendia bemacham skim ngambi sida ti tuai agi ulih meli rumah,” ku iya.
Nambah ke nya, ku iya, perintah nyelinting ngaga 20,000 unit rumah ulih dibeli nengah Strategi Pemansang Pengudah COVID-19 (PCDS) 2030 dikena tetangkupka peminta rayat ba selampur nengeri.
Pengawa nya mujur ngelanchar Mutiara Open Day 2026, pengawa nyuaka surat ngempu Rumah Spektra Mutiara (RSM) sereta nyuaka bantu nengah Skim Bantu Mayar Baru (HDRAS).
Program diatur Mutiara Mortgage & Credit Sdn Bhd nya dikena ngerembai akses ngempu rumah nengah mayuh inisiatif bayar enggau sukung ngagai rayat.
Sama datai, Sekretari Pekara Wang Sarawak Dato Sri Dr. Wan Lizozman Wan Omar, Sekretari Mendam Opis Menteri Pengerai Mensia Mayuh, Pengawa Berumah enggau Perintah Lokal Sarawak Datu Elizabeth Loh, Tuai Pegawai Eksekutif Mutiara Mortgage & Credit Sdn Bhd Awang Irwan Awang Shawal, Tuai Pegawai Eksekutif HDC Fathi Hambali, Sapit Tuai Pegawai Eksekutif HDC Jamilah Jami’an Bujang sereta pengari agensi perintah enggau raban bekuasa lokal. - EDISI UKAS
Pemberita :Lonney Jinab
Gambar : Ibanez Jeffery Guang
