SIBU: Inisiatif negap sistem pengerai menua ransing dipejalai lebuh perintah nyelinting ngisi 15,000 pangku pengawa nyadi indu misi ba hospital perintah selampur menua taun tu.

Sapit Menteri Pengerai, Dato Hanifah Hajar Taib madah, pengawa nya beguna amat dikena mutar suntuk pengereja pengawa ti majak nyata naka diatu.

Ku iya, peminta nya diperansang trend populasyen menua ti majak mansang tuai sereta kes penyakit raya majak nambah baka diabetes enggau penanggul tungkul atau ti begunaka pengawa matau timpuh panjai.

"Kitai suah ninga indu misi nya tulang belakang sistem nyaga pengerai lalu penerang nya endang amat.

"Pangku pengawa sida ngelui protokol klinikal; sida nyadi penyambung entara asai enda dikeibuh tauka enda (pesakit)," ku iya lebuh bejadi Program Diploma Indu Misi enggau Makmal Simulasyen Indu Misi di Institut Methodist Pilley (MPI), kena Hari Enam.

Ngenang silik, Dato Hanifah ti mega Kaban Parlimen Mukah nyemetak madah penau enggau pengelandik indu misi bepelasarka penyiru sereta pengibuh ulih ngubah pengawa berubat nyadi palan nyuman ti besai agi reti.

Ba pengawa nya, iya mega muji inisiatif MPI bejalaika program diploma nya ti engkeman dikena tetangkupka peminta makit kereja.

Iya mega nerima manah pengawa nyain Sempekat Pemereti Ati (MoU) entara MPI begulai enggau Palan Perubat Rejang enggau Palan Perubat Borneo ti nyendia pelanja penuh sereta elaun ngagai nembiak.

"Inisiatif nya chunto pemadu manah baka ni kolaborasyen entara institusyen pelajar enggau sektor peribit ulih nyungkak pemansang, seraya tetangkupka tanggungjawab rama korporat dikena negap sistem pengerai mensia mayuh," ku iya baru.

Diploma Kejururawatan di MPI diatu disedia ungkup rejista pengambi kohort keterubah ungkup program tiga taun nya belabuh 27 April 2026.

Program nya mega disedia ungkup nembiak ti abis SPM ti hulih abis nadai kredit ba Jaku Melayu, Matematik (Matematik Asas/Moden/Tambah) sereta Sains (Sains/Biologi/Kimia/Fizik), lalu pas Jaku English enggau siti subjek tambah bukai.

Diploma nya mega diaku ba renggat global sereta nitih ke atur malin ti udah ditetapka Malaysian Qualifications Agency (MQA) enggau Malaysian Nursing Board (MNB).

Bela datai ba pengawa nya, Ahli Dewan Negara Senator Robert Lau Hui Yew, Chairman Kaunsil Direktor MPI Paul Wong Hee Kwong, Sapit Chairman MPI Dr. Peter Tang, Presiden Aum Ninting Taun China Sarawak Rev. Dr. Lau Hui Ming, pengari Palan Perubat Rejang Dr. Lau Ngiik Chuong sereta pengari Palan Perubat Borneo Dr. John Chew.-EDISI UKAS