KUCHING: Sarawak deka terus megai tanggungpengawa besai ba pengawa nentu entara Malaysia, Indonesia enggau Brunei ti bela nyamin hak nengeri semampai dijaga ba isu strategik nya.
Pekara nya dipadah maya penemuai basa Menteri Pengeraja Asal enggau Pemeruan Rampa Menua Datuk Seri Arthur Joseph Kurup ngagai Yang di-Pertua Negeri Sarawak, Tun Pehin Sri Dr Wan Junaidi di Astana Negeri Sarawak, Hari Empat.
Opis Menteri nya madahka Perintah Sarawak semampai dibai ba semua pengawa bekaul nentu entara menua.
Randau maya nya bela bekaul mulaika baru tanah Perintah Besai ke enda dikemansang ngagai Perintah Sarawak bepelasarka hak nengeri.
Tun Pehin Sri Dr Wan Junaidi mega bisi bekunsika penemu enggau peneleba iya maya ke agi gawa nyadi Menteri Pengeraja Asal enggau Rampa Menua sebedau tu kelimpah bela berandauka pekara bekaul Sempekat Malaysia 1963 (MA63).
Bela datai maya nya Tuai Sekretari Opis Menteri Pengeraja Asal enggau Pemeruan Rampa Menua Datuk Wira Anis Rizana Mohamad Zainudin, Tuai Direktor Opis Nyukat enggau Kar Malaysia Dato LSr Hazri Hasan, Penyanding Penemu Undang-Undang Dr Salahudin Dato Hidayat Shariff enggau Sekretari Bagi Tanah, Sukat enggau Geospatial Datuk Muhammad Yasir Yahya.-EDISI UKAS
