KUCHING: Pengawa beperesa pengerai tumu nyadi chara pemadu engkeman dikena mutar pemayuh kes riman kolorektal di Sarawak ke majak nambah maya tu.
Rikod mandangka penyampau kes nya majak nambah ari 1,365 kes ba taun 2021 nyadi 2,189 kes ba 2023, alai Kuching dipadahka pemadu mayuh.
Ketegal nya, program penemu disungkakka nengah Kimpin Penemu Riman Kolorektal 2026 udah diatur di Hospital Besai Sarawak ba pengelama dua hari.
Program nya dipenyadi Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Menua Sarawak, Datuk Amar Profesor Dr Sim Kui Hian ti ngarika Premier Sarawak, Hari Empat.
Ba teks jaku Premier Sarawak ke dibacha Datuk Amar Profesor Dr Sim, iya madah, chara nyeliah nyadi chara ke engkeman dikena nentu pengelikun pengerai diri.
"Tu digaga kitai nengah pengawa beperesa tumu lebih agi sida ke mudah ditepan penyakit," pia ku iya.
Iya mega madah, pengawa beperesa tumu ukai semina ngulihka diri mujur berubat tang bela ngurangka penanggul ba sistem pengerai ba timpuh panjai.
Premier Sarawak madah, penemu bekaul riman kolorektal patut disungkakka agi lalu ukai semina digaga bemusim aja.
Maya nya, Datuk Amar Dr Sim bela madahka pemesai reti autonomi pengerai dikena ngulihka langgur timpuh panjai muntang agi digaga enggau efisyen di Sarawak.
"Pekara pengerai tu bekaul polisi enggau langgur timpuh panjai.
"Enti kitai bisi autonomi, kitai nadai penanggul ngelanggur pengawa baka kereban enggau raban gawa ti engkeman agi," ku iya madah.
Iya enggau nya ngelalau mensia mayuh lengkas beperesa tumu lebih agi sida ke mudah ditepan penyakit nyengkaum ke beumur 50 taun ke atas tauka bisi sejarah penyakit nya nyadi ba sida sebilik.-EDISI UKAS
