KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi udah datai di Padang Bilun Antarabansa Kuching (LTAK) kena lemai Hari Lima pengudah nangga aji di Makkah Al-Mukarramah.
Penatai seduai disambut bala pemesai nengeri ti mandangka pengaga ati nerima pemulai seduai pengudah ngereja rukun Islam kelima.
Entara bala datai nyambut penatai seduai iya nya Speaker Kunsil Nengeri Sarawak Tan Sri Datuk Amar Mohamad Asfia Awang Nassar, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, bala Sapit Menteri Kabinet Sarawak, bala Tuai Opis Perintah enggau temuai dipebasa bukai.
Lebuh datai, siti pengawa rumpas diatur dipun enggau sembiang betuai ke Sapit Imam Besai Sarawak, Mohd Ihsan Haidzir kelai terima kasih ke pemujur enggau pengawa dikereja di Makkah.
Tun Pehin Sri Dr Wan Junaidi enggau Toh Puan Datuk Patinggi Fauziah meri terima kasih ke hadrat Allah SWT diberi peluang nangga aji sereta meri terima kasih ngagai bala pemesai nengeri, pegawai perintah enggau semua bala ke datai nyambut pemulai seduai.
